Nazir: "Gözlənilməz olsa da, pandemiya şəraitində martın əvvəlindən ölkədə 80 min iş yeri açılıb"

Nazir: "Gözlənilməz olsa da, pandemiya şəraitində martın əvvəlindən ölkədə 80 min iş yeri açılıb"
# 15 dekabr 2020 12:20 (UTC +04:00)

Gözlənilməz olsa da, yeni növ koronavirus (COVID-19) pandemiyası şəraitində Azərbaycanda martın əvvəlindən indiyədək təxminən 80 min yeni iş yeri açılıb.

"APA-Economics"in məlumatına görə, bunu Azərbaycanın iqtisadiyyat naziri Mikayıl Cabbarov Alman-Azərbaycan Xarici Ticarət Palatası (AHK Azərbaycan) tərəfindən "KPMG Azerbaijan" şirkəti ilə əməkdaşlıq çərçivəsində nəşr olunan "Azərbaycanda Xarici Biznes 2020" hesabatının rəsmi təqdimatında deyib.

Nazirin sözlərinə görə, açılan yeni iş yerləri özəl sektorda olan ümumi əmək müqavilələrinin 15%-dən çoxunu təşkil edir.

M. Cabbarov onu da qeyd edib ki, Azərbaycan pandemiya fonunda əsas iqtisadi göstəricilərini ilin əvvəlində olan səviyyədə saxlamağı bacarıb və nümunə kimi, ölkənin strateji valyuta ehtiyatlarının demək olar dəyişməyən həcmini gətirib. Stabil valyuta bazarına toxunan nazir manatın məzənnəsinin stabil qaldığını xatırladıb.

Qeyd edək ki, "Azərbaycanda Xarici Biznes 2020" hesabatı Azərbaycanda fəaliyyət göstərən xarici biznes nümayəndələrinin iştirak etdiyi Biznes Mühiti Sorğusunun nəticələrinə əsaslanır və xüsusilə də ölkədəki investisiya mühitinə fokuslanır.

#
#

ƏMƏLİYYAT İCRA OLUNUR