Sənaye və energetika

Ana səhifə

«Shirvan Oil» şirkəti yanvar-iyul aylarında neft hasilatını 8% azaldıb

26 avqust 2008 11:28 (UTC +04:00)

Bakı. Vüqar Mustafayev – APA-Economics. Azərbaycanın quru sahəsində yerləşən «Kürovdağ» yatağının işlənməsi ilə məşğul olan «Shirvan Oil» Əməliyyat Şirkəti 2008-ci ilin yanvar-iyul ayları ərzində 117,5 min ton həcmində neft hasil edib. Bununla da şirkət neft hasilatını 2007-ci ilin analoji 7 aylıq göstəricisinə nisbətən 8,1% azaldıb. Təkcə iyul ayında yataqdan 16,3 min ton neft hasil olunub. Bu barədə «APA-Economics»ə «Shirvan Oil» Əməliyyat Şirkətinin baş ofisindən məlumat verilib.
Xatırladaq ki, «Kürovdağ» yatağının işlənməsinə dair saziş ARDNŞ-la Böyük Britaniyanın «Caspian Energy Group» şirkəti arasında 2004-cü ilin noyabrın 5-də imzalanıb. Hər iki tərəfin layihədəki iştirak payı 50%-ə bərabərdir.
Qeyd edək ki, Bakıdan 106 km cənub-qərbdə, Kürün hövzəsində yerləşən bu yatağın ümumi sahəsi 115 kv. km təşkil edir. Yataq şərti olaraq üç bloka bölünüb – Şimal, Mərkəzi və Cənub blokları. Neftin qalıq ehtiyatları 5,5 mln. ton həcmində qiymətləndirilir. Şirkətin quyu fondu 350 vahid, neftin ortasutkalıq hasilat səviyyəsi 677 ton təşkil edir. Neft hasilatının səviyyəsi sazişin qüvvədə olacağı 25 il ərzində 2003-cü ilə nisbətən ən azı 50% artırılmadlıdır. Lakin kontraktın müddəti bitdikdən sonra o, tərəflərin razılığı ilə daha 5 il müddətinə uzadıla bilər.