Dünya Bankı qızılın qiyməti üzrə proqnozunu açıqlayıb

#
# 11:35
21 aprel 2021

Dünya Bankının son proqnozlarına görə, 2021-ci ildə qızılın bir unsiyasının orta qiymətinin 4% azalaraq 1 700 ABŞ dolları təşkil edəcək. Bu qiymət ötən proqnozla (oktyabr ayı) müqayisədə 2% azdır.

"APA-Economics"in məlumatına görə, bu barədə Dünya Bankının yenilənmiş proqnozunda deyilir.

Qeyd olunur ki, 2022-ci ildə qızılın qiyməti bir qədər də azalaraq 1 600 dollara enəcəyi güman edilir. Bu, oktyabr proqnozu ilə müqayisədə 3,5% azdır. Uzunmüddətli proqnozlar 2023-cü ildə metalın qiymətinin 1 550 dollara qədər enəcəyini istisna etmir.

Dünya Bankı qeyd edir ki, cari ilin I rübündə ABŞ xəzinə qiymətli kağızlarının real gəlirliyinin artmasında sonra maliyyə investisiyalarının həcminin azalması səbəbindən sözügedən qiymətli metalın dəyəri 4% azalıb. Tədarükə gəldikdə, banka görə, qızıl hasilatı COVID-19 məhdudiyyətlərindən sonra bərpa olunur və qiymətlərin istehsal xərclərindən xeyli yüksək olduğu üçün 2022-ci ilə qədər istehsalın genişlənəcəyi gözlənilir.

Bundan əlavə, qlobal iqtisadi bərpa fonunda digər qiymətli metalların – gümüş və platinin bahalaşması müşahidə olunur. Bununla birgə, qlobal iqtisadi artımının sayəsində sözügedən metalların sənayedə daha geniş istifadəsi eləcə Rusiya və Cənubi Afrikada tədarükdə dayanmalar gümüş və platinin qiymətinə təkan verir.

Dünya Bankının yenilənmiş proqnozlarına əsasən, gümüşün bu il ortalama qiyməti 22% artaraq 1 unsiyaya görə 25 dollar, 2022-ci ildə isə bir qədər də azalaraq 22 dollara enəcək. Platinin dəyəri bu il 24,6% artaraq 1 100 dollara, 2022-ci ildə isə 1 110 dollara yüksələcək.

#
#

ƏMƏLİYYAT İCRA OLUNUR