Sənaye və energetika

Ana səhifə

Çovdar nekropolu ilə bağlı elmi tədqiqatların ikinci mərhələsinə başlanıb - FOTO

07 may 2021 15:21 (UTC +04:00)

Heydər Əliyev Fondu və “AzerGold” QSC dəstəyi ilə Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutu Çovdar nekropolunda aşkar edilən tapıntılar üzərində elmi tədqiqatların ikinci mərhələsinə başlayıb.

QSC-dən “APA-Economics”ə verilən məlumata görə, “AzerGold” və Arxeologiya və Etnoqrafiya İnstitutu arasında 2021-ci ildə imzalanan müqaviləyə əsasən, Son tunc - Erkən dəmir dövrünün (e.ə.II min.sonu - I min. əvvəli) Xocalı-Gədəbəy mədəniyyətinə aid Çovdar nekropolunda aşkar edilən artefaktların kameral tədqiqi həyata keçirilir. Layihənin əsas məqsədi qədim mədəni irsimizi daha dərindən tədqiq və təbliğ etmək, onları konservasiya edərək gələcək nəsillərə ərməğan etməkdir.

Qeyd edək ki, layihə çərçivəsində arxeologiya sahəsində zəngin təcrübəyə malik xarici ekspertlər də elmi tədqiqatlara cəlb ediləcək, nüfuzlu beynəlxalq laboratoriyalarda insan qalıqları əsasında onların cinsi, yaşı, xəstəlikləri, ölüm səbəbləri, qohumluq əlaqələri və qida rasionu kimi məlumatların əldə edilməsini təmin edən C14, karbon (13C) və azot (14N) izotopları üzrə analizlər aparılacaq. Bundan başqa, Daşkəsən rayonunun Çovdar kəndi və ətraf ərazilərin poleoekoloji şəraiti, landşaftı, topoqrafiyası və tədqiq olunan dövrdə ərazidə məskunlaşma sıxlığının öyrənilməsi planlaşdırılıb. Həmçinin görülən işlər və onların nəticələrinin beynəlxalq səviyyədə təbliği məqsədi ilə beynəlxalq nüfuzlu elmi sərgilərdə silsilə məqalələrin dərci, o cümlədən elmi hesabat və xüsusi nəşrin hazırlanması nəzərdə tutulub.

Xatırladaq ki, 2019-cu ilin fevral ayında “AzerGold” QSC-nin Daşkəsən rayonunda yerləşən “Çovdar” Filiz Emalı Sahəsində aparılan tikinti işləri zamanı qədim məzar nümunələri aşkar edilib. Ərazidə tikinti işləri dərhal dayandırılıb, aidiyyəti üzrə çöl-tədqiqat işlərinin həyata keçirilməsi üçün Arxeologiya və Etnoqrafiya İnstitutuna müraciət edilib. Nəticədə institutun şöbə müdirləri, tarix üzrə fəlsəfə doktorları Səfər Aşurov və Bəxtiyar Cəlilovun rəhbərliyi altında “Daşkəsən” arxeoloji ekspedisiyası təşkil edilib. 5 ay müddətində davam edən arxeoloji qazıntı işləri zamanı aşkarlanan qəbirlərin sayı 156-ya çatıb. Qəbirlərdən 6 000-dən çox eksponat çıxarılıb.