Xəzərin Azərbaycan sektorunda yerləşən "Şahdəniz" yatağının işlənməsinin ikinci mərhələsi ("Şahdəniz 2") çərçivəsində şimal cinahında beşinci quyudan hasilata başlanılıb.
"APA-Economics"in məlumatına görə, bu barədə BP şirkətinin açıqlamasında deyilir.
Qeyd olunur ki, bu, 2021-ci ilin IV rübünə planlaşdırılmış mühüm bir əməliyyatdır və layihə çərçivəsində təhlükəsiz və qrafikə uyğun şəkildə əldə edilmiş daha bir uğurdur.
"Mövcud "Şahdəniz 1" və "Şahdəniz 2" qurğularının hasilat gücü hazırda gündə təxminən 70 mln. (ildə 25 mlrd. çox) standart kubmetrdir", - açıqlamada deyilir.
2021-ci ilin iyul ayında ilk dəfə olaraq "Şahdəniz Bravo" platformasından gündəlik hasilat "Şahdəniz Alfa" ilə eyni səviyyəyə çatıb. İlin ilk üç rübündə yataqdan ümumilikdə - "Şahdəniz Alfa" və "Şahdəniz Bravo" platformalarından birlikdə təqribən 16 mlrd. standart kubmetr qaz və 3 mln. ton (təqribən 24 mln. barel) kondensat hasil edilib.
Qeyd edək ki, "Şahdəniz" yatağı üzrə pay bölgüsü haqqında saziş 1996-cı ildə imzalanıb və ratifikasiya edilib. Layihədə BP (operator – 28,8%), AzSD (10%), "SGC Upstream" (6,7%), "Petronas" (15,5%), "Lukoil" (10%), NICO (10%) və TPAO (19%) şirkətləri iştirak edir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
