2021-ci il, noyabrın 3-də Milli Məclisin İqtisadi siyasət, sənaye və sahibkarlıq komitəsi tərəfindən keçirilən iclasda ölkəmizə gətirilən hibrid avtomobillərin idxalı və satışı, elektrik avtomobillərinin isə satışı ƏDV-dən azad edildi. APA TV xəbər verir ki, bənzər qərarların qəbul edilməsi ekosistemin qorunması ilə bərabər, vətəndaşın büdcəsi üçün də yetərincə sərfəlidir. Lakin son illər Azərbaycan maşın bazarında öz yerini tutmağa çalışan elektromobillər nədənsə hibrid avtomobillərə çox sürətlə uduzur. Araşdırmalar zamanı öyrəndik ki, bu avtomobillərin ölkə bazarına daxil olmasının qarşısında 2 böyük əngəl dayanır: Orta statistik azərbaycanlı üçün hətta birinci əl avtomobilə nəzərən belə yüksək sayılacaq qədər baha qiymətlər və elektromobil ehtiyat hissələrinin azlığı və təmirinin mürəkkəbliyi Nəqliyyat eksperti Raqif Raufoğlunun sözlərinə görə, sadalanan problemlər bu nəqliyyat vasitələrinin birbaşa yox, dolayı problemləridir və aradan qaldırılması bütün dünya ölkələri üzrə böyük çətinliklər yaradır. Mütəxəssis deyir ki, hibrid avtomobillərin elektron mühərrikli nəqliyyat vasitələrinə nisbətən daha çox satılmasının birinci səbəbi büdcə qənaətidirsə, ikinci səbəb sırf təmir prosesinin rahatlığı ilə bağlıdır. Raqif Raufoğlunun ustalarla bağlı səsləndirdiyi fikrin nə qədər doğru olub-olmadığını öyrənmək üçün əvvəlcə ölkədə fəaliyyət göstərən elektromobil ustalarının sayı ilə maraqlandıq. İş orasındadır, nə soraqlaşa-soraqlaşa, nə də internet resursları əsasında apardığımız araşdırmanın nəticəsi ürəkaçan olmadı... Arabir elektron mühərrikli avtomobillərin təmiri ilə də məşğul olduğunu deyən Fuad usta elektromobil ehtiyat hissələrinin çatışmazlığı ilə bağlı fikirləri təsdiqləsə də, başlıca problemin kəllə-çarxdan düşməyən qiymətlər olduğunu deyir. Lakin ekoloji tarazlıq və iqlim dəyişikliyi ilə mübarizədə elektromobilləri Azərbaycandan didərgin salan səbəblər təkcə arzuolunmaz qiymət və təmiri çətin idarəetmə sistemi deyil. Nəqliyyat üzrə ekspert Elməddin Muradlının sözlərinə görə, ölkə üzrə quraşdırılan cərəyandoldurma məntəqələrinin durumuna baxsaq, problemin qaynağının dərinliyinə enmiş olarıq. Belə. Biz televiziya olaraq həmişəki kimi açdıq sandığı, tökdük pambığı. Ancaq yerə dağılan bu qədər problemi yığıb-yığışdırmaq aidiyyatı üzrə qurumların işidir ki, onların da öz vəzifələrini yerinə yetirməsi üçün lazımi rəsmi qərarlar artıq qəbul olunub. Hətta dövlət rəhbərliyi səviyyəsində. Bəs onlar nəyi və niyə gözləyir? Bunu artıq zaman göstərəcək. Yeri gəlmişkən, istehsal tarixi 3 ildən və mühərrikinin həcmi 2500 kubsantimetrdən çox olmayan hibrid avtomobillərin idxalı və satışının, habelə elektrik mühərriki ilə işləyən avtomobillər üçün ikinci və üçüncü səviyyə elektrik enerji doldurucularının idxalının 2022-ci il yanvarın 1-dən 3 il müddətinə ƏDV-dən azad edilməsi nəzərdə tutulur.
Mir Çingiz Ağazadə,
Kamran Namazov,
Ziya Allahyarov,
APA TV
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
