İctimai Nəqliyyat üzrə Beynəlxalq Assosiasiyanın ümumi yığıncağı keçirilib

İctimai Nəqliyyat üzrə Beynəlxalq Assosiasiyanın ümumi yığıncağı keçirilib
# 21 iyun 2021 15:51 (UTC +04:00)

100 ölkədən 200-dən artıq şəhər nəqliyyatına məsul qurumu özündə birləşdirən İctimai Nəqliyyat üzrə Beynəlxalq Assosiasiyasının ümumi yığıncağı keçirilib.

Bu barədə APA-ya Bakı Nəqliyyat Agentliyindən məlumat verilib.

Bildirilib ki, İdarə Heyətinin sədri Vüsal Kərimlinin də iştiak etdiyi görüşdə təşkilatın ötən il ərzində fəaliyyəti nəzərdən keçirilib və büdcə-audit hesabatları dinlənilib. Assosiasiyanın Nizamnaməsində Ümumi Yığıncağın və üzv təşkilatların vəzifələri və digər təşkilati məsələlərlə bağlı müvafiq düzəlişlər edilib, asosiasiyanın 2021-ci il üçün fəaliyyət planı təqdim olunub və əsas istiqamətlər müzakirə edilərək qəbul edilib. 

Qeyd olunub ki, yeni fəaliyyət planı çərçivəsində nəzərdə tutulan tədbirlər “Həyat üçün Mobillik” (Mobility for Life) şüarı altında keçiriləcək. Bu tədbirlərin icrası sayəsində şəhər həyatında rəqabətqabiliyyətlilik, sağlamlıq və ətraf mühit kimi əsas komponentlər nəzərə alınmaqla ictimai nəqliyyatın əhəmiyyətini inkişaf etdiriləcək.

Fəaliyyət planı özündə əsas 4 proqramı birləşdirir: dayanıqlı şəhər və ictimai nəqliyyat, karbonlaşdırılmamış və aşağı emissiya mobilliyi, daha yaxşı şəhər mobilliyi üçün sistemlər və xidmətlərin inkişaf etdirilməsi, ictimai nəqliyyatın və onun şəhər mühitinin yenidən müəyyənləşdirilməsi. 

Tövsiyə olunub ki, bu proqram üzv təşkilatlar tərəfindən də fəaliyyətlərinin planlaşdırılması və icrası zamanı nəzərə alınsın. 

Toplantıda İdarə Heyətinə seçilmiş səlahiyyətli nümayəndələr təsdiq edilib. İlk dəfə olaraq təşkilatın fəaliyyətində müstəsna rolları olan nümayəndələr fəxri adlarla təltif olunub. 

Sonda Assosiasiyanın vitse-prezidenti, Orta Şərq ölkələri və Şimali Afrika ofisinin rəhbəri, eyni zamanda Səudiyyə Ərəbistanı İctimai Nəqliyyat Şirkətinin sədri Xalid Alhoqail İctimai Nəqliyyat üzrə Beynəlxalq Assosiasiyasının növbəti 2 il müddətinə yeni prezidenti seçilib. 

Bakı Nəqliyyat Agentliyi İctimai Nəqliyyat üzrə Beynəlxalq Assosiasiyaya 2018-ci ildə üzv qəbul edilib. Assosiasiya 1885-ci il avqustun 17-də təsis edilib. Baş qərargahı Brüssel şəhərində yerləşən təşkilat 16 regional filial və əlaqələndirmə mərkəzini özündə birləşdirir. Təşkilatın 100 ölkədən 1800 üzvü var. İctimai nəqliyyatın təbliğ edilməsi, ən yaxşı təcrübənin yayılması, beynəlxalq forum və konfransların keçirilməsi təşkilatın əsas fəaliyyət istiqamətlərindəndir.

#
#

ƏMƏLİYYAT İCRA OLUNUR