Komitə: Pandemiyadan daha çox qadın və uşaqlar əziyyət çəkib

#
# 16:11
22 aprel 2021

“Artıq 1 ildən çoxdur ki, bütün dünyada COVID-19 pandemiyası tüğyan edir. Hamı üçün eyni olan bu problemin nəticələrindən daha çox qadın və uşaqlar əziyyət çəkib”.

APA-nın məlumatına görə, bunu Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva deyib.

Onun sözlərinə görə, statistikaya əsasən, bütün dünyada pandemiya dövründə zorakılıq hallarında artım müşahidə olunub : “Bir ailədə zorakılıq varsa, bundan daha çox uşaqlar zərər görür. Eyni zamanda, uşaqlar onlayn platformada da zorakılıqla üzləşirlər. Pandemiya dövründə onlayn zorakılıq hallarının artması da müşahidə olunmaqdadır”.

C. Rəhmətullayeva qeyd edib ki, digər ölkələrdə olduğu kimi, Azərbaycanda da pandemiyanın başladığı ilk günlərdən dövlət səviyyəsində bütün sahələrdə olduğu kimi uşaq müdafiəsi sahəsində də təcili təxirəsalınmaz tədbirlərin həyata keçirilib: “Biz Avropa Şurasının üzvü olaraq təşkilatın uşaq hüquqları üzrə müxtəlif komitələrində bu sahədə keçirilən bütün təşəbbüslərə, konfranslara qoşularaq təkliflərimizi veririk. Dövlət Komitəsi və nəzdində fəaliyyət göstərən Uşaq və Ailələrə Dəstək Mərkəzlərinin iştirakı ilə icmalarda işin qurulması, onlayn təhlükəsizlik üzrə maarifləndirmə işlərinin gücləndirilməsi istiqamətində tədbirlərin həyata keçirilib, eyni zamanda psixo-sosial dəstək layihələrinin icra edilib”.

C.Rəhmətullayeva xüsusilə diqqətə çatdırıb ki, Azərbaycan uşaqları son 1 il ərzində pandemiya ilə yanaşı, həm də 44 günlük Vətən müharibəsini də yaşayıblar: “Bu müharibə dövründə münaqişə zonasına yaxın olmayan şəhərlərin uşaqları erməni terrorunun qurbanı oldular. Terror nəticəsində 12 uşaq qətlə yetirildi, 50 uşaq yaralandı. Mərkəzlərin mütəxəssisləri həm də müharibədən zərərçəkən, post müharibə dövründə böyük stress və travmalar almış uşaq və ailələrlə yaxından çalışırlar”.

#
#

ƏMƏLİYYAT İCRA OLUNUR