“Son illər sosial statusundan asılı olmayaraq hər kəs üçün bərabər imkanların yaradılması məqsədilə həyata keçirilən kompleks islahatlar onu deməyə əsas verir ki, cəmiyyət olaraq maariflənmək və inklüzivliyə hazır olmaq ən mühüm tələbdir, sosial sifarişdir”.
APA-nın məlumatına görə, bunu Xüsusi qayğıya ehtiyacı olan insanlar üçün 3-cü "Fərdi Fərqlər" onlayn Konqresində çıxış edən Azərbaycanın İnsan Hüquqları üzrə Müvəkkili (Ombudsman) Səbinə Əliyeva bildirib.
Onun sözlərinə görə, Azərbaycanda əlilliyi olan şəxslərin, o cümlədən bu qəbildən olan uşaqların reabilitasiyası ilə bağlı məsələlər daim dövlətin diqqət mərkəzindədir: “Bu istiqamətdə zəruri tədbirlər həyata keçirilir. Birinci vitse-prezident, Heydər Əliyev Fondunun prezidenti Mehriban Əliyevanın təşəbbüsü ilə müasir dövrün tələblərinə uyğun fəaliyyət göstərən reabilitasiya mərkəzləri yaradılır. Ümid edirik ki, gələcəkdə autizmli uşaqların kompleks şəkildə reabilitasiya proseslərinə cəlb olunması məqsədilə Bakıda bu cür mərkəzlərin sayı arıtırlacaq, eyni zamanda, ən qısa zamanda regionlarda da yaradılması təmin ediləcək".
Ombudsman qeyd edib ki, autizm spektr pozuntusu olan uşaqların vaxtında aşkar edilərək kompleks şəkildə reabilitasiyaya və təhsil prosesinə cəlb edilməsini təmin etmək üçün müasir diaqnostika və reabiltasiya inkişaf mərkəzlərinin, ixtisaslaşdırılmış təhsil müəssisələrinin olmaması, peşəkar kadrların, həkim, kliniki psixoloqlar, pedaqoq, sosial işçilərin azlığı ciddi çətinliklər yaradır: "Ona görə də bu cür problemləri olan uşaqlar üçün müasir diaqnostika və reabilitasiya mərkəzlərinin, ixtisaslaşdıırlmış təhsil müəssisələrinin yaradılması olduqca vacibdir. Ombudsman təsisatı olaraq autizmli şəxslərə dövlət qayğısı haqqında xüsusi bir qanunun və müvafiq dğvlət proqramının, habelə digər bu kimi vacib sənədlərin hazırlanaraq qəbul edilməsini məqsədəmüvafiq hesab edirik. Buna görə də autizmli şəxslərə dövlət qayğısının artırılması ilə bağlı hüquqi bazanın formalaşdırılmasına nail olmaq məqsədilə geniş təşviqat işi aparmaq, bu sahədə maarifləndirmə fəaliyyətinin artırılması qarşımızda duran əsas vəzifələrdən biridir”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
