“Biz COVID-19-a qarşı daha effektiv mübarizə aparmalıyıq. Azərbaycan Prezidenti Türk Şurası və Qoşulmama Hərəkatının sammitlərində bununla bağlı çağırışlar edib”.
APA-nın məlumatına görə, bunu bu gün “COVID-19-dan sonrakı dünya” mövzusunda VIII Qlobal Bakı Forumu çərçivəsində keçirilən "COVİD-19-dan sonra yeni dünya nizami" panelinin açılış mərasimində Azərbaycanın xarici işlər naziri Ceyhun Bayramov bildirib.
C. Bayramov deyib ki, dünya hələ COVID-19-dan sonrakı dövrə keçməyib: “Pandemiyanın təsirləri həyatımızda hələ müəyyən müddət də olacaq. Azərbaycan Prezidenti peyvəndlərə bərabər çıxışın təmin edilməsi və onların bərabər şəkildə paylanılması üçün BMT qarşısında təşəbbüslə çıxış edib”.