Kassanov: "Ahıska türkləri Azərbaycanın maraqlarının müdafiəsi istiqamətində ciddi səylə çalışacaqlar"

Kassanov: "Ahıska türkləri Azərbaycanın maraqlarının müdafiəsi istiqamətində ciddi səylə çalışacaqlar"
# 22 aprel 2021 17:47 (UTC +04:00)

Bu gün Milli Məclis Sədrinin müavini Adil Əliyev Dünya Ahıska Türkləri Birliyinin sədri Ziyəddin Kassanovun rəhbərlik etdiyi nümayəndə heyəti ilə görüşüb.

Milli Məclisin mətbuat və ictimaiyyətlə əlaqələr şöbəsindən APA-ya verilən məlumata görə, vitse-spiker 2020-ci ilin şanlı tariximizin ən parlaq səhifələrindən biri olduğunu qeyd edib.

Bildirib ki, Müzəffər Ali Baş Komandan, Prezident İlham Əliyevin rəhbərliyi ilə Rəşadətli Ordumuzun qazandığı tarixi qələbə uzun illər yaddaşlardan silinməyəcək.

Adil Əliyev ölkəmizin Azərbaycanda yaşayan bütün xalqların vahid Vətəni olmasına, hər kəsin tolerant mühitdə yaşadığına diqqət çəkərək, 44 gün davam edən Vətən müharibəsində Azərbaycan xalqının ölkə başçısının ətrafında sıx birləşərək düşmənə döyüş meydanında sarsıdıcı zərbə vurduğunu qeyd edib. Sədr müavini Ermənistanın 30 illik işğalına həmişəlik son qoyulduğuna, dünyanın Ermənistanın törətdiyi cinayətlərə qarşı hələ də səssiz qalmasına diqqət çəkib.

Vitse-spiker faşizmin Ermənistanın dövlət siyasətinin ana xətti olmasını vurğulayaraq işğaldan azad edilmiş ərazilərimizdə Ermənistan tərəfindən törədilmiş vəhşiliklərdən danışıb. 

Adil Əliyev Ermənistanın müharibədə məğlubiyyətə uğrayaraq təslim olmasına baxmayaraq, bu günə qədər minalanmış sahələrin xəritələrinin ölkəmizə verilmədiyini, bu səbəbdən də vətəndaşlarımızın minaya düşərək həlak olduqlarını və xəsarət aldıqlarını qonaqların diqqətinə çatdırıb.

Ermənistanın minalanmış sahələrin xəritələrini verməməsinin növbəti hərbi cinayət olmasına diqqət çəkən Sədr müavini, həm də işğal altında olan torpaqlarımızın bütün maddi sərvətlərinin, təbii ehtiyatlarının düşmən tərəfindən mənimsənildiyini, həmin ərazilərdə olan qızıl, mis yataqlarının Ermənistan və onun xarici müttəfiqləri tərəfindən dayanmadan talan edildiyini bildirib. Qeyd edib ki, hazırda ölkəmizə dəyən ziyanın hesablanması ilə əlaqədar olaraq xarici mütəxəssislərin iştirakı ilə komissiyalar fəaliyyət göstərir və dəyən ziyan qiymətləndirildikdən sonra ərazilərdəki abadlıq və quruculuq işləri daha da intensiv hal alacaq.

Ziyəddin Kassanov Azərbaycanda yaşayan ahıska türklərinin də digər millətlərlə bərabər firavan bir mühitdə yaşadığını diqqətə çatdırıb. Azərbaycanın qazandığı tarixi qələbədən danışan qonaq bu Qələbənin türk dünyası tarixində mühüm yeri olduğunu bildirib. O, Birliyin çap etdiyi nəşrlərdə Azərbaycan Respublikası Prezidentinin çıxışlarına xüsusi yer verildiyini, hazırda yaşadıqları Qazaxıstan Respublikasında Azərbaycanın Vətən müharibəsi dövründə haqq səsini ucaltdıqlarını qeyd edib. Qonaq bundan sonra da Azərbaycanın maraqlarının müdafiəsi istiqamətində ciddi səylə çalışacaqlarını diqqətə çatdırıb.

Görüşdə iştirak edən Türkiyə Cümhuriyyətinin ölkəmizdəki sabiq səfiri Hulusi Kılıç Azərbaycanın Vətən müharibəsində qələbəsindən danışıb, ölkəmizin Cənubi Qafqazın lideri olmasından qürur duyduğunu qeyd edib.

Sonra görüşdə tərəfləri maraqlandıran digər mövzularda da fikir mübadiləsi aparılıb.

#
#

ƏMƏLİYYAT İCRA OLUNUR