Milli QHT Forumu Baydenin çıxışı ilə bağlı etiraz bəyanatı yayıb

Milli QHT Forumu Baydenin çıxışı ilə bağlı etiraz bəyanatı yayıb
# 26 aprel 2021 12:55 (UTC +04:00)

Azərbaycan Milli QHT Forumu ABŞ Prezidenti Cozef Baydenin 1915-ci il hadisələrini “soyqırımı” adlandırması ilə bağlı etiraz bəyanatı yayıb.

APA xəbər verir ki, bəyanatda deyilir: “Azərbaycan Milli QHT Forumu olaraq, ABŞ Prezidenti Cozef Baydenin 1915-ci ildə qondarma "erməni soyqırımı" ilə bağlı siyasi motivlər daşıyan və bölgədəki yeni bərqərar olunmuş sülhə və əməkdaşlığa  zərər gətirən açıqlaması bizdə təəssüf hissi yaradır.

ABŞ Prezidentinin radikal erməni dairələri və anti-Türkiyə qruplaşmalarının təzyiqi altında 1915-ci il hadisələrinə dair bəyanatı qəbuledilməzdir. Türkiyəyə qarşı təhrif olunmuş tarixi ittihamların səsləndirilməsi yalnız cəmiyyətlər arasında nifrət, intiqam və düşmənçilik hisslərinə həvəs göstərmək istəyənlərin əlində oyuna çevrilməsinə yaradılan şəraitdir.

Türkiyə dövləti dəfələrlə Ermənistana və dünya dövlətlərinə həmin dövrün hadisələrinin birgə tarixi komissiya tərəfindən araşdırılması barədə çağırış edib. Lakin Ermənistan bu təklifi qəbul etməyib. Ermənistanın tarixi faktların saxtalaşdırılması və ekspansiya siyasəti yalnız qardaş Türkiyəyə qarşı deyil, uzun illər ərzində Azərbaycana qarşı da həyata keçirilib. 1918-ci ilin mart ayından başlayaraq Azərbaycanın müxtəlif şəhərlərində 50 mindən çox türk-müsəlman qətliam edilməsi, son 30 ildə Ermənistan silahlı qüvvələri tərəfindən 30 mindən çox dinc azərbaycanlı əhalinin öldürülməsi, o cümlədən 1992-ci il fevralın 26-da Ermənistan hərbi birləşmələri tərəfindən 7 min əhalisi olan Xocalı şəhərində amansız cinayət törədilməsi, əhaliyə qarşı soyqırımı aktları təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdəndir.

Tərkibində 700-dən çox QHT-ni birləşdirən Azərbaycan Milli QHT Forumu olaraq hər zaman qardaş Türkiyənin yanında olduğumuzu bildirir və ABŞ Prezidenti Cozef Baydenin qondarma “erməni soyqırımı” məsələsinə dair mövqeyini qətiyyətlə pisləyirik. Bu cür yanaşmalar ayrı-ayrı regionların və ümumilikdə bəşəriyyətin dayanıqlı sülhpərvər inkişafına təhdiddir”.

#
#

ƏMƏLİYYAT İCRA OLUNUR