Binəqədidə yaşayış binasının yanmasında təqsirləndirilən şəxsin məhkəmədə halı pisləşib - YENİLƏNİB

Binəqədidə yaşayış binasının yanmasında təqsirləndirilən şəxsin məhkəmədə halı pisləşib - <span style="color: red;">YENİLƏNİB
# 26 iyul 2016 10:07 (UTC +04:00)

Bakı. Etibar Məmmədov - APA. Bakı Ağır Cinayətlər Məhkəməsində Binəqədi rayonunda yaşayış binasında baş verən yanğınla bağlı təqsirləndirilən şəxslərin cinayət işi üzrə məhkəmə prosesi fasilədən sonra davam etdirilib.

APA-nın məlumatına görə, hakim Əfqan Hacıyevin sədrliyi ilə keçirilən prosesdə zərərçəkmiş şəxslər ifadə veriblər.

Zərərçəkən Sədaqət Məsimova hadisə nəticəsində evinin yandığını deyərək, günahkar şəxslərdən dəymiş zərərin ödənilməsini istəyib.

Zərərçəkmişlər dövlət ittihamçısı və müdafiə tərəfinin suallarını cavablandırıblar.

Sonra təqsirləndirilən Miryusif Mahmudovun vəkili vəsatətlə çıxış edib və müdafiə etdiyi şəxsin səhhətində ciddi problem olduğundan onun müalicə müəssisəsinə göndərilməsini istəyib.

Məhkəmə vəsatəti qismən təmin edib və M. Mahmudovun səhhəti ilə bağlı Penitensiar Xidmətə məktub göndəriləcəyi qeyd olunub.

Proses iyulun 28-də davam etdiriləcək.

***

11:36

Bakı. Etibar Məmmədov - APA. Bu gün Bakı Ağır Cinayətlər Məhkəməsində Binəqədi rayonunda yaşayış binasında baş verən yanğınla bağlı təqsirləndirilən şəxslərin cinayət işi üzrə məhkəmə prosesi davam etdirilib.

APA-nın məlumatına görə, hakim Əfqan Hacıyevin sədrliyi ilə keçirilən prosesdə zərərçəkmiş şəxslər ifadə veriblər.

Kifayət Nəcəfova hadisə nəticəsində oğlu Yaşar Nəcəfzadənin dünyasını dəyişdiyini deyib.

Şahnaz Qəniyeya ifadəsində baş verən hadisə nəticəsində azyaşlı övladını itirdiyini qeyd edib. O, təqsirləndirilən şəxslərdən heç bir tələbinin olmadığını deyib.

Samirə Həmidova isə hadisə nəticəsində mənzilinin tamam yandığını açıqlayıb.

Prosesdə təqsirləndirilən şəxslərdən biri - "Qlobal Stone" və "Global Constuction" MMC-nin təsisçisi Miryusif Mahmudovun halı pisləşib, məhkəməyə təcili tibbi yardım çağırılıb.

Məhkəmədə fasilə elan olunub.

Qeyd edək ki, ötən il mayın 19-da paytaxtın Binəqədi rayonu ərazisində çoxmərtəbəli yaşayış binasında ağır nəticələrə səbəb olmuş yanğınla bağlı binaların üzlənməsində istifadə olunan “poliuretan” məmulatını istehsal edən "Qlobal Stone" və "Global Constuction" MMC təsisçisi Miryusif Mahmudov, “Qlobal Stone” MMC-nin baş direktoru Uğur Bəşirov, “Global Construction” MMC-nin sədr müavini Ələkbər Əsgərov, 2012-2013-cü illərdə Binəqədi rayon mənzil-kommunal təsərrüfat birliyinin rəisi işləmiş rayon icra hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı mənzil-kommunal istismar sahəsinin rəisi Nizami Orucov və binanın poliuretan materialla üzlənməsi işlərinə nəzarət funksiyalarını həyata keçirməli olan, 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzov, Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları həbs qətimkan tədbiri seçilib.

Bundan başqa, cinayət işinə "Dərnəgül Boru" Zavodunun laboratoriya rəhbəri Ağacavad Məmmədov və Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov da cəlb edilib. Onlar barəsində həbs-qətimkan tədbiri seçilməyib.

Yanğın nəticəsində 15 nəfər ölüb, 50 nəfər xəsarət alıb.

1 2 3 4 5 İDMAN XƏBƏR
#
#

ƏMƏLİYYAT İCRA OLUNUR