Rusiya İstintaq Komitəsi: "Crocus City Hall"dakı terrorda 60-dan çox insan ölüb - VİDEO - YENİLƏNİB-5

Rusiya İstintaq Komitəsi: "Crocus City Hall"dakı terrorda 60-dan çox insan ölüb - VİDEO  - YENİLƏNİB-5
# 23 mart 2024 04:27 (UTC +04:00)

"Crocus" konsert kompleksində törədilən terror aktı nəticəsində 60-dan çox insan həlak olub.

APA-nın Moskva müxbiri xəbər verir ki, bu barədə Rusiya İstintaq Komitəsi məlumat yayıb.

Bildirilib ki, terror aktı qurbanlarının sayı hələ də arta bilər.

***

Saat 02:48

Moskvada "Crocus City Hall" konsert kompleksində baş verən terror aktında ölənlərin sayı artıb.

APA xəbər verir ki, bu barədə "Baza" teleqram kanalı məlumat yayıb.

İlkin məlumatlara görə, ölənlərin sayı 62 nəfərə çatıb.

Eyni zamanda binanın bütün otaqları hələ də yoxlanılmayıb.

Bu səbəbdən ölənlərin sayı arta bilər.

***

22.03.2024

Saat 23:24

Rusiya Federasiyası Federal Təhlükəszlik Xidməti "Crocus City Hall"da baş verən terror aktında ölənlərin sayını açıqlayıb.

APA xəbər verir ki, hadisə nəticəsində 40 nəfər ölüb, onların arasında azyaşlılar da var

Bildirilib ki, atışmada 100-dən çoxu insan yaralanıb.

Meyitlərin binadan çıxarılması davam edir.

***

Saat 22:19

"Crocus City Hall"da atışma nəticəsində 40 nəfər həlak olub, 100-dən çox insan yaralanıb.

APA-nın Moskva müxbiri xəbər verir ki, bu barədə "112" teleqram kanalı məlumat yayıb.

***

Saat 22:16

Moskva vilayətinin Krasnoqorsk şəhərində yerləşən "Crocus City Hall" konsert salonunda baş verən silahlı insidentlə bağlı operativ qərargah yaradılıb.

APA-nın Moskva müxbiri xəbər verir ki, Krasnoqorsk administrasiyasından verilən məlumata görə, bütün qüvvə və vasitələr hadisə yerinə yönələndirilib, zərərçəkənlər barədə məlumat dəqiqləşdirilir.

Rusiya teleqram kanalları hadisə yerində çoxlu sayda ölənlərin və yaralıların olduğunu bildirirlər.

Qeyd edək ki, bu gün axşam saatlarında kamuflyaj geyinmiş ən azı üç nəfər "Crocus City Hall" binasının birinci mərtəbəsinə girərək avtomat silahlardan atəş açıblar.

Həmçinin qumbara və yanan maddə atıldığından güclü yanğın başlayıb.

Konsert salonunun tavanı qismən çöküb.

"Shot" teleqram kanalı azı beş nəfər silahlı şəxsin hücumda iştirak etdiyinə dair məlumat yayıb.

Rosqvardiyanın xüsusi təyinatlı qüvvələri hadisə yerinə cəlb olunub.

Moskva vilayətinin Səhiyyə Nazirliyinin mətbuat xidmətindən verilən məlumata görə, 30-dan çox regional və 20 təcili tibbi yardım briqadası əraziyə göndərilib.

***

Saat 21:54

Moskva vilayətinin "Crocus City Hall" konsert salonunda baş verən atışmada ölənlərin sayı 15-ə çatıb.

APA-nın Moskva müxbiri xəbər verir ki, bu barədə "Readovka" teleqram kanalı məlumat yayıb.

"Mash" teleqram kanalı isə konsert salonunda partlayış baş verdiyini, tavanın çökdüyü barədə məlumat yayıb.

"Mash" eyni zamanda silahlı iki nəfərin konsert salonuna daxil olaraq insanlara atəş açmasının görüntülərini də yayıb.

***

Saat 21:31

Moskvada yerləşən "Crocus City Hall" ticarət mərkəzində atışma olub.

APA xəbər verir ki, bu barədə "Baza" telegram kanalı məlumat yayıb.

Maskalı şəxslər içəridə olanlara atəş açıb, ilkin məlumata görə, azı 12 nəfər ölüb, 35 nəfər isə yaralanıb.

Hadisədən sonra binada yanğın başlayıb.

#
#

ƏMƏLİYYAT İCRA OLUNUR