Əli Əhmədov: “Radikal müxalifətin Azərbaycanın 2020-ci ildə futbol üzrə Avropa çempionatına ev sahibliyi etmək istəyinin əleyhinə çıxış etməsi düzgün deyil”

Əli Əhmədov: “Radikal müxalifətin Azərbaycanın 2020-ci ildə futbol üzrə Avropa çempionatına ev sahibliyi etmək istəyinin əleyhinə çıxış etməsi düzgün deyil”
# 14 iyun 2012 08:49 (UTC +04:00)
Bakı. Ramil Məmmədli-APA. “Radikal müxalifətin Azərbaycanın 2020-ci ildə futbol üzrə Avropa çempionatına ev sahibliyi etmək istəyinin əleyhinə çıxış etməsi və bunu ölkədə insan hüquqlarının pozulması ilə əlaqələndirməsi düzgün deyil”. APA-nın məlumatına görə, bu açıqlamanı jurnalistlərə Yeni Azərbaycan Partiyasının (YAP) sədr müavini, partiyanın icra katibi Əli Əhmədov verib.

O bildirib ki, Azərbaycan cəmiyyətinin mütləq əksəriyyəti ölkədə həyata keçirilən uğurlu siyasəti birmənalı olaraq dəstəkləyir və bu siyasət çərçivəsində Azərbaycanda keçirilən bu və ya digər beynəlxalq tədbirləri yüksək qiymətləndirir: “Avropanın ən mötəbər mahnı yarışmasının Bakıda keçirilməsi Azərbaycan xalqının milli qürurunun daha da yüksəlməsinə səbəb olur. Bu birmənalı şəkildə qeyd edilməlidir ki, əgər 2020-ci ildə futbol üzrə Avropa çempionatının Bakıda keçirilməsi ilə bağlı qərar qəbul edilərsə, bu Azərbaycanın nüfuzunun yüksəlməsinə səbəb olacaq. Azərbaycan hökuməti və xalqı bu yarışmanın Bakıda keçirilməsi üçün lazım olan hər bir addımı atmağa hazırdır. Çox az sayda insan var ki, biz onların müxalifət olduğunu qeyd edə bilərik. Təbii ki, bu müxalifətin hamısı deyil”.

Əli Əhmədov bildirib ki, müxalifət Azərbaycanın uğurlarını görmək istəmir: “Onlar Azərbaycanda həyata keçirilən və ölkənin inkişafına səbəb olan addımlara qarşı çıxmış olurlar. Azərbaycanın daha da çox tanınmasına istiqamətlənən hər hansı addım atılırsa, onlar buna qarşı çıxmış olurlar. Beləliklə də onlar öz maraqları ilə xalqın milli maraqlarının böyük ziddiyyət təşkil etdiyini bir daha ortaya qoyurlar. Təbiidir ki, maraqları xalqın maraqları ilə üst-üstə düşməyən hər hansı siyasi qüvvənin ölkə daxilindəki siyasi proseslərdə yaxından iştirak etməsi qeyri-mümkündür. Məxsusi olaraq onların hakimiyyət iddialarının həyata keçirilməsi də sadəcə olaraq imkan daxilində deyil. Xalqın maraqlarından kənarda fəaliyyət göstərən hər hansı siyasi qüvvənin Azərbaycan xalqının dəstəyini əldə etməsi mümkün deyil. Onlar da dəfələrlə bu tip hərəkətləri ilə özlərinin maraqlarının xalqın maraqlarına qarşı olduğunu sübuta yetiriblər”.
#
#

ƏMƏLİYYAT İCRA OLUNUR