Daxili siyasət

Ana səhifə

Daxili siyasət

Bakıda “Aqo” monitorinq qrupunun iştirakı ilə məhkəmə sisteminin fəaliyyətinə həsr olunmuş dəyirmi masa keçirilib - YENİLƏNİB

Bakıda “Aqo” monitorinq qrupunun iştirakı ilə məhkəmə sisteminin fəaliyyətinə həsr olunmuş dəyirmi masa keçirilib - <font color=#FF0000>YENİLƏNİB</font>

06 iyul 2007 08:24 (UTC +04:00)

Ədliyyə Nazirliyinin mətbuat xidmətindən APA-ya verilən məlumata görə, dəyirmi masada Konstitusiya Məhkəməsinin sədri Fərhad Abdullayev, Ali Məhkəmənin sədri Ramiz Rzayev, Prezidentin İcra Aparatının hüquq-mühafizə orqanları ilə iş şöbəsinin müdiri Fuad Ələsgərov, baş prokuror Zakir Qaralov, Vəkillər Kollegiyasının sədri Azər Tağıyev və insan hüquqları üzrə müvəkkil Elmira Süleymanova, ədliyyə naziri Fikrət Məmmədov iştirak ediblər. Tədbiri giriş sözü ilə açan Məhkəmə-Hüquq Şurasının sədri, ədliyyə naziri Fikrət Məmmədov hüquqi dövlətdə müstəqil məhkəmə hakimiyyətinin rolunu və əhəmiyyətini qeyd edərək, ölkəmizdə məhkəmə sisteminin müasirləşdirilməsinə, ədalət mühakiməsinə inamın gücləndirilməsinə yönələn islahatlar barədə ətraflı məlumat verib. Qonaqlar Azərbaycanda bu sahədə görülən işlər barədə verilən məlumatların onlarda böyük təəssürat yaratdığını qeyd ediblər. “Aqo” monitorinq qrupu nümayəndə heyətinin rəhbəri Per Syöqren Azərbaycanın məhkəmə sisteminə həyata keçirilən islahatların Avropa Şurası tərəfindən dəstəkləndiyini bildirib. Nümayəndə heyətinin üzvləri cəzaçəkmə müəssisəsinə baş çəkmələri ilə bağlı təəssüratlarını bölüşüb və səmərəli əməkdaşlığa görə Ədliyyə Nazirliyinə təşəkkür ediblər. Tədbirdə məhkəmə fəaliyyətinin səmərəliliyi, hakimlərin müstəqilliyi, peşəkarlığı, onların sosial müdafiəsi, məhkəmə qərarlarının icrası, vəkillik fəaliyyəti, hüquqi yardım sistemi və digər mövzular üzrə geniş müzakirələr keçirilib, ədalət mühakiməsinin həyata keçirilməsi ilə bağlı konkret məsələlərə dair fikir mübadiləsi aparılıb.
Azərbaycanda səfərdə olan Avropa Şurası Nazirlər Komitəsinin “Aqo” Monitorinq Qrupunun üzvləri dünən Ədliyyə Nazirliyi Penitensiar Xidmətinin 1 saylı Cəzaçəkmə Müəssisəsində olublar. Bu barədə APA-ya Ədliyyə Nazirliyinin mətbuat xidmətindən bildirilib. Məlumata görə, “Aqo” qrupunun üzvləri monitorinqlə bağlı təəssüratlarını dünən Ədliyyə Nazirliyində məhkəmə sisteminin fəaliyyətinə həsr olunana dəyirmi masada bölüşüblər.
“Aqo” qrupunun üzvləri bu gün Mərkəzi Seçki Komissiyasının sədri Məzahir Pənahovla da görüş keçiriblər. APA-nın məlumatına görə, görüşdən sonra jurnalistlərə qısa açıqlama verən monitorinq qrupunun rəhbəri Per Syorqen bildirib ki, görüşdə Azərbaycanın seçki sistemi ilə bağlı müzakirələr keçirilib, 2008-ci ildə keçiriləcək prezident seçkiləri ilə bağlı görüləcək işlərlə bağlı fikir mübadiləsi aparılıb. MSK-nın mətbuat xidmətindən APA-ya verilən məlumata görə, isə görüşdə “Aqo” üzvləri sonuncu parlament seçkilərində ortaya çıxan nöqsanlarla bağlı hansı addımların atılması, 2008-ci il prezident seçkilərinə hazırlıq, seçki qanunvericiliyinin dəyişdirilməsi ilə bağlı aparılan müzakirələr və irəli sürülən təkliflərlə maraqlanıblar. MSK sədri Məzahir Pənahov 2005-ci il parlament seçkilərində qanun pozuntularına yol vermiş seçki komissiyalarının üzvlərinin cəzalandırıldığını, onların yeniləri ilə əvəz olunduğunu bildirib. O, növbəti prezident seçkilərinə hazırlıq məqsədi ilə aşağı seçki dairələri üçün kursların təşkil olunacağını deyib. Bundan əlavə Seçki Məcəlləsinin dəyişməsi ilə bağlı Venesiya Komissiyasında müzakirələrin davam etdiyini və sentyabrın birinci ongünlüyündə növbəti müzakirələrin başlayacağını vurğulayıb. /APA/