Daxili siyasət

Ana səhifə

Daxili siyasət

Abdulla Gül: “Dağlıq Qarabağın işğal olunduğunu görməmək çox böyük yanlışlıq olar”

07 noyabr 2007 17:31 (UTC +04:00)

O, səfərini səmərəli adlandırıb və müxtəlif sazişlərin imzalandığını, iki ölkə arasında əlaqələri inkişafa aparan sənədlərin olduğunu, razılıqlar əldə edildiyini vurğulayıb.
PKK terror təşkilatının Türkiyədə yaratdığı gərginliyin Bakı-Tiflis-Ceyhan boru kəmərinə də təhlükə olması ilə bağlı suala cavabında Abdulla Gül kəmərin təhlükəsizliyinin tam qarantiya altında olduğunu bildirib və narahatlığa əsas görməyib: “Bu layihə reallaşdırılanda kəmərin təhlükəsizliyi məsələsi də diqqətə alınıb”.
Türkiyə prezidenti PKK-nın zərərsizləşdirilməsi üçün əməliyyatın vaxtı ilə bağlı suala cavabında ölkəsinin terrorla mübarizədə qərarlı olduğunu bir daha vurğulayıb: “Biz qərarımızda qətiyik. Bəzən Türkiyənin İraqı işğal etmək istədiyi barədə yanlış fikirlər səsləndirilir. Biz sadəcə, terrorun kökünü kəsmək istəyirik. Terror təkcə Türkiyə üçün deyil, bütün ölkələr üçün təhlükədir. Buna görə də terrora qarşı hamı bir yerdə mübarizə aparmalıdır”.
Abdulla Gül Türkiyənin baş naziri Rəcəb Tayyip Ərdoğanın PKK-da ermənilərin də olması ilə bağlı açıqlamasına aid sualı cavablandırarkən “təəssüf ki, qanunsuz işlərlə məşğul olanlar, terrora qarışanlar həmişə iş birliyində olurlar. Terror təhlükəsi haradan gəlirsə gəlsin, buna qarşı millət və din ayrılığı qoymadan mübarizə aparmaq lazımdır” deyib. Ölkəsinin Dağlıq Qarabağla bağlı mövqeyinin dəyişmədiyini söyləyən prezident Gül “Dağlıq Qarabağın işğal olunduğunu görməmək çox böyük yanlışlıq olar” deyib.
Türkiyənin və Azərbaycanın Avropa Şurasının üzvü olduğunu deyən prezident hər iki ölkənin demokratiya yolunda addımladığını söyləyib: “İnanıram ki, Azərbaycan zaman keçdikcə bu yolda daha da irəliləyəcək. Demokratiya üçün önəmli olan iradədir. Azərbaycanda bu iradə ta Heydər Əliyev dönəmindən ortaya qoyulub”.
Hər ölkədə müəyyən problemlər olduğunu deyən Türkiyənin dövlət başçısı bunların zamanla həllini tapdığını söyləyib.
Türkdilli ölkələr arasında gediş-gəlişin vizasız olmasının tərəfdarı olduğunu deyən A. Gül
bunun həlli üçün bəzi infrastruktur problemlərinin olduğunu söyləyib: “İnanıram ki, qarşıdakı illərdə biz bu problemi həll edəcəyik”. /APA/