Azərbaycanda 50-dən artıq mütəxəssis beynəlxalq magistr sertifikatı alıb

Azərbaycanda 50-dən artıq mütəxəssis beynəlxalq magistr sertifikatı alıb
# 20 iyun 2012 09:53 (UTC +04:00)
Bakı. Əli Əhmədov – APA-Economics. BP şirkəti və onun Azərbaycandakı tərəfdaşlarının təsis etdiyi Layihələri İdarəetmə Məktəbi (LİM) məzunlarının böyük qrupuna Corc Vaşinqton Universitetinin layihələri idarəetmə ixtisası üzrə Magistr sertifikatları təqdim edilib.

«APA-Economics»in məlumatına görə, bu, BP şirkəti və onun tərəfdaşlarının təsis etdiyi və maliyyələşdirdiyi bir qurumdur. Fəaliyyət göstərdiyi bir il ərzində LİM dünyada qəbul olunmuş layihələri idarəetmə təlim proqramlarından istifadə etməklə, özəl və ictimai sektorda fəaliyyət göstərən 62 təşkilatın 150-dək nümayəndəsinə uğurla təlim keçib. Bunların 51 nəfəri Corc Vaşinqton Universitetinin magistr, 92 nəfəri isə bakalavr sertifikatı üçün ixtisaslaşıb. Bu dəfə sertifikat almış 50-dən çox məzun neft və qaz, hökumət, layihələndirmə və tikinti, dəniz və geologiya, təhsil, bank və maliyyə, telekommunikasiya və idarəetmənin digər sektorlarını təmsil edirlər.

Tədbirdə «BP-Azerbaijan» şirkətinin əlaqələr və xarici işlər üzrə vitse-prezidenti Seymur Xəlilov LİM-in fəaliyyət göstərdiyi bir il ərzində 150 menecerə təlim keçilməsini və bunlardan 50-dən çoxuna beynəlxalq magistr sertifikatının təqdim olunmasını yüksək qiymətləndirib və ümid edib ki, bu iş bundan sonra da davam edəcək.

Qeyd edək ki, LİM 2011-ci ilin yanvarında təsis edilib. BP şirkəti və onun Azərbaycandakı tərəfdaşları tərəfindən bunun üçün 1 mln. dollar vəsait ayrılıb. Layihə Xəzər Universiteti ilə əməkdaşlıqda layihələri idarəetmə və onunla bağlı məsələlərin həlli sahəsində aparıcı təlim şirkəti olan «ESI International» tərəfindən həyata keçirilir.
#
#

ƏMƏLİYYAT İCRA OLUNUR