“Şahdəniz” konsorsiumu “Nabucco” layihəsini ikinci qaz ixracı variantı kimi təsdiqləyib

“Şahdəniz” konsorsiumu “Nabucco” layihəsini ikinci qaz ixracı variantı kimi təsdiqləyib
# 28 iyun 2012 14:19 (UTC +04:00)
Bu barədə «APA-Economics»ə «BP-Azerbaijan» şirkətindən bildirilib.

Şirkətdən verilən məlumata görə, Türkiyə-Bolqarıstan sərhədindən Baumqartenədək (Avstriya) bir marşrutu nəzərdə tutan «Nabucco West» layihəsi «Şahdəniz»in ikinci mərhələsi çərçivəsində hasil olunacaq qazın Mərkəzi Avropaya potensial ixracı üçün boru kəməri variantı kimi seçilib. «Şahdəniz» tərəfdaşlarının Bolqarıstan, Rumıniya və Macarıstanla əməkdaşlıqda tərtib etdikləri Cənubi-Şərqi Avropa Boru Kəməri (SEEP) layihəsinin işlənməsi isə dayandırılır.

«Bu qərar 2011-ci ildə ictimaiyyətə açıqlanmış seçim meyarları əsasında qəbul edilib. Xüsusən də «Nabucco West» layihəsinin daha yetkin olması konsorsiuma bu layihənin ikinci mərhələ ilə eyni vaxt çərçivəsində işlənib hazır ola biləcəyi əminliyini verib. Konsorsium indi həmin layihənin miqyası, texniki araşdırmaları və kommersiya təklifinin optimallaşdırılması məqsədilə «Nabucco West»lə əməkdaşlıq edəcək», - deyə «BP-Azerbaijan» şirkətindən bildirilib.

Eyni meyarlar əsasında konsorsium bu ilin fevral ayında Trans-Adriatik Boru Kəməri (TAP) layihəsini ikinci mərhələ çərçivəsində hasil olunacaq qazın İtaliyaya ixracı üçün potensial marşrut kimi seçib. Həmin qərardan keçən müddət ərzində «Şahdəniz» konsorsiumu TAP vasitəsilə birgə işləyərək, bu yaxınlarda həmin layihə ilə bir əməkdaşlıq sazişi bağlayıb.

Şirkətdən həmçinin bildirilib ki, «Şahdəniz» konsorsiumu seçilmiş hər iki boru kəmər variantının sahibləri ilə işləməkdə davam edəcək. «Şahdəniz» bu iki layihə arasında öz yekun seçim qərarını 2013-cü ilin ortaları üçün planlaşdırılmış ikinci mərhələ layihəsinin yekun sərmayə qərarından əvvəl verəcək, həmçinin həmin vaxtadək müvafiq qaz satışı sazişlərini də bağlayacaq.

Qeyd edək ki, 1999-cu ildə kəşf edilən “Şahdəniz” yatağı 1,2 trln. kubmetr qaz ehtiyatı ilə dünyanın ən böyük qaz-kondensat yataqlarından biridir. O, Bakıdan 70 km cənub-şərqdə, suyun dərinliyinin 50-500 m arasında dəyişdiyi Xəzər dənizinin şelfində yerləşir. “Şahdəniz” yatağının işlənməsi layihəsinin ikinci fazası çərçivəsində illik hasilatın 25 mlrd. kubmetrə çatacağı proqnozlaşdırılır. “Şahdəniz” yatağını özünün “Şahdəniz” üzrə Hasilatın Pay Bölgüsü Sazişindəki (HPBS) tərəfdaşları adından BP şirkəti işlədir. HPBS-in iştirakçıları BP (operator - 25,5%), “Statoil” (kommersiya operatoru - 25,5%), ARDNŞ (10%), “LUKoil” (10%), “Naftiran Intertrade Co.” (10%), “Total” (10%) və “TPAO” (9%) şirkətləridir.
#
#

ƏMƏLİYYAT İCRA OLUNUR