Sahibkarlıq

Ana səhifə

Sahibkarlıq

Azərbaycanda hüquqi şəxslərin sayı ilin əvvəlindən 3% artıb

25 oktyabr 2010 09:39 (UTC +04:00)

Bakı. Nicat Mustafayev – APA-Economics. Bu ilin yanvar-sentyabr ayları ərzində Azərbaycanda hüquqi şəxslərin sayı cari ilin əvvəli ilə müqayisədə 2,8% artaraq 92,5 minə çatıb.

Dövlət Statistika Komitəsindən «APA-Economics»ə verilən məlumata görə, sözügedən artım iqtisadiyyatın «Daşınmaz əmlakla əlaqədar əməliyyatlar», «Digər sahələrdə xidmətlərin göstərilməsi», «Maliyyə və sığorta fəaliyyəti», «Peşə, elmi və texniki fəaliyyət», «Təhsil» və « İnformasiya və rabitə» bölmələrində daha nəzərəçarpacaq dərəcədə olub.

Xüsusi mülkiyyətdə olan hüquqi şəxslərin əsas hissəsi «Topdan və pərakəndə ticarət, avtomobillərin və motosikletlərin təmiri» (37%), «Kənd təsərrüfatı, meşə təsərrüfatı və balıqçılıq» (12,9%), «Digər sahələrdə xidmətlərin göstərilməsi» (12,5%), «Tikinti» (10,2%), «Emal sənayesi» (7,3%) və «İnzibati və yardımçı xidmətlərin göstərilməsi» (5,2%) bölmələrinin payına düşüb.

Statistik vahidlərin Dövlət Registrində qeydiyyatdan keçmiş tam xarici investisiyalı və birgə müəssisələr əsasən Türkiyə (30,7%), Böyük Britaniya (11,3%), Rusiya (7,5%), İran (6,0%), ABŞ (5,5%) və Almaniya (2,7%) sahibkarları tərəfindən yaradılıb.

Hesabat dövründə ləğv edilmiş hüquqi şəxslərin 24,9%-i «Topdan və pərakəndə ticarət, avtomobillərin və motosikletlərin təmiri», 23,1%-i «Kənd təsərrüfatı, meşə təsərrüfatı və balıqçılıq», 14,1%-i «Tikinti», 9,6%-i «Digər sahələrdə xidmətlərin göstərilməsi», 8%-i «Emal sənayesi», qalanları isə digər bölmələrin payına düşüb.

Bu dövrdə yeni yaranmış hüquqi şəxslərin 29,8%-i «Digər sahələrdə xidmətlərin göstərilməsi», 25,7%-i «Topdan və pərakəndə ticarət, avtomobillərin və motosikletlərin təmiri», 13%-i «Tikinti», 6,6%-i «Peşə, elmi və texniki fəaliyyət», 4,3%-i «Emal sənayesi» və 4%-i «Kənd təsərrüfatı, meşə təsərrüfatı və balıqçılıq» bölmələrinin payına düşüb.

Cari ilin yanvar-sentyabr aylarında qeydiyyatdan keçmiş hüquqi şəxslərin 84,5%-i xüsusi mülkiyyətli, 3,5%-i dövlət mülkiyyətli, 10%-i tam xarici investisiyalı, 1,9%-i isə birgə müəssisələrin payına düşüb.

Bu il oktyabrın 1-i vəziyyətinə ölkədə fəaliyyət göstərən hüquqi şəxslərin ümumi sayının 82,6%-ni kiçik müəssisələr təşkil edib ki, bunların da əsas hissəsi ticarət (38,5%), kənd təsərrüfatı (12,9%) və tikinti (12%) sahələrində fəaliyyət göstərir.