Dünya Bankı: Biznes mühiti, innovasiyalar, sahibkarlığın inkişafı kimi sahələrdə təcrübəmizi Azərbaycanla bölüşməyə hazırıq

Dünya Bankı: Biznes mühiti, innovasiyalar, sahibkarlığın inkişafı kimi sahələrdə təcrübəmizi Azərbaycanla bölüşməyə hazırıq
# 07 iyun 2019 12:20 (UTC +04:00)

Azərbaycanın iqtisadiyyat naziri Şahin Mustafayev Dünya Bankının Cənubi Qafqaz üzrə səlahiyyət müddəti başa çatmış regional direktoru xanım Mersi Tembon və Bankın Cənubi Qafqaz üzrə yeni regional direktoru Sebastian Molineusla görüşüb.

APA-nın İqtisadiyyat Nazirliyinə istinadən verdiyi məlumata görə, görüşdə Dünya Bankının Cənubi Qafqaz üzrə səlahiyyət müddəti başa çatmış regional direktoru xanım Mersi Tembonla çox səmərəli əməkdaşlıq edildiyini vurğulayan iqtisadiyyat naziri Şahin Mustafayev ona bundan sonrakı fəaliyyətində uğurlar arzulayıb. Sebastian Molineusu yeni təyinatı münasibətilə təbrik edən nazir Şahin Mustafayev gələcək qarşılıqlı əməkdaşlığın uğurlu olacağına əminliyini vurğulayıb.

Şahin Mustafayev bildirib ki, Azərbaycan Dünya Bankı ilə əməkdaşlığa böyük önəm verir, Bankın ölkəmizə göstərdiyi texniki yardım və maliyyə dəstəyi yüksək qiymətləndirilir. Azərbaycanın Dünya Bankı ilə sıx əməkdaşlıq edir. Layihələrdə qabaqcıl beynəlxalq təcrübənin tətbiqi, müasir texnologiya və yeniliklərin ölkəmizə gətirilməsi əhəmiyyətlidir. Ümumilikdə, Dünya Bankı tərəfindən Azərbaycana 54 layihə üzrə kredit ayrılıb. Bunlardan 48 layihə başa çatdırılıb, daha 6 layihə üzrə işlər isə davam etdirilir.

Azərbaycan və Dünya Bankı arasında əlaqələr çoxşaxəlidir. Bankla bir sıra layihələr, o cümlədən "Bərk məişət tullantılarının vahid idarəçiliyi" layihəsi uğurla icra olunaraq Dünya Bankının mükafatına layiq görülüb.

Şahin Mustafayev Azərbaycanda iqtisadiyyatın, o cümlədən qeyri-neft sektorunun inkişafı istiqamətində həyata keçirilən tədbirlər, iqtisadiyyatın şaxələndirilməsi, özəl bölmənin inkişafı, ixracın genişləndirilməsi, investisiyaların təşviqi və biznes mühitinin daha da yaxşılaşdırılması istiqamətində həyata keçirilən tədbirlər barədə məlumat verib. Diqqətə çatdırılıb ki, Dünya Bankının “Doing Business 2019” hesabatında Azərbaycan 32 pillə irəliləyərək 190 ölkə arasında 25-ci yerdə qərarlaşıb və 10 ən islahatçı ölkə sırasına daxil edilib.

Görüşdə Dünya Bankı ilə gələcək əməkdaşlıq imkanları üzrə fikir mübadiləsi aparılıb.

Mersi Tembon səmərəli əməkdaşlığa görə təşəkkürünü və Azərbaycanla əməkdaşlıqdan məmnunluğunu bildirib. Vurğulanıb ki, əməkdaşlıq müddətində Azərbaycan çox dəyişib və inkişaf edib. Xanım Mersi Tembon vurğulayıb ki, Azərbaycanın “Doing Business” hesabatında davamlı olaraq irəliləməsi sevindiricidir və əldə olunan nailiyyətlər yüksək qiymətləndirilir.

Sebastian Molineus biznes mühiti, innovasiyalar, sahibkarlığın inkişafı kimi sahələrdə malik olduğu təcrübəni bölüşməyə hazır olduğunu, Azərbaycanda aparılan iqtisadi islahatların Bank tərəfindən dəstəkləndiyini vurğulayıb.

#
#

ƏMƏLİYYAT İCRA OLUNUR