Avropa Şurasının Nazirlər Komitəsində sədrlik Böyük Britaniyaya keçib

Avropa Şurasının Nazirlər Komitəsində sədrlik Böyük Britaniyaya keçib
# 07 noyabr 2011 16:01 (UTC +04:00)
APA-nın məlumatına görə, noyabrın 7-də Strasburqda AŞ-nın Nazirlər Komitəsində sədrliyin ötürülməsi ilə bağlı xüsusi iclas keçirilib. Toplantıda Ukraynanın sədrliyi adından, bu ölkənin xarici işlər naziri Konstantin Qrişşenko Komitəyə sədrliyi dövrünün nəticələri haqqında qurum qarşısında hesabat verib. Böyük Britaniyanın xarici işlər naziri Uilyam Haq quruma 6 ay sədrliyi ərzindəki prioritetləri AŞNK-yə təqdim edib.

Böyük Britaniyanın başlıca prioritetləri sırasına Avropa İnsan Hüquqları Məhkəməsində (AİHM) islahatların davam etdirilməsi, Avropa Şurasının baş katibi Torbyorn Yaqladın təşkilatın yenidən qurulması üzrə proqramının dəstəklənməsi, qanunun aliliyinin möhkəmləndirilməsi, İnternet idarəetmə məsələləri və yerli və regional səviyyədə demokratiyanın dəstəklənməsi daxildir. Eyni zamanda, Britaniya sədrliyi dövründə AŞ-nın digər əhəmiyyətli proqramlarının həyata keçirilməsində yaxından iştirak edəcəyini bəyan edib.

Böyük Britaniyanın AŞNK-yə sədrliyi çərçivəsində, bu ölkənin xarici işlər naziri Uilyam Haq AŞ-nın baş katibi ilə birgə keçirdikləri brifinqdə əsasən AİHM-də aparılan islahatlardan danışıblar. Böyük Britaniyanın Avropa İnsan Hüquqları Konvensiyasını ratifikasiya etmiş ölkə olduğunu xatırladan ingilis nazir, qurumdakı islahatların davam etdirilməsini qarşıdakı 6 ay ərzində sədrlikləri dövründə önəmli məsələ olacağını vurğulayıb: «Ən vacib məqsədimiz Strasburq məhkəməsinin işini daha da effektiv şəkildə işləyə bilməsini təmin etmək və bunun üçün əlavə mexanizmlərin tapılması istiqamətində səylərimizi əsirgəməməliyik. Elə etməliyik ki, məhkəmə 1950-ci illərdəki kimi rahat fəaliyyət göstərə bilsin».

Bugünkü toplantıda Böyük Britaniyadan sonra əlifba sırası ilə quruma sədrlik edəcək Albaniya və Andoranın xarici işlər nazirləri də iştirak ediblər.

Qeyd edək ki, Böyük Britaniya AŞ-nın Nazirlər Komitəsinə 2012-ci il mayın 14-dək sədrlik edəcək. Bundan sonra sədrlik Albaniyaya keçəcək.
#
#

ƏMƏLİYYAT İCRA OLUNUR