Bakı – APA. İslam Əməkdaşlıq Təşkilatı xarici işlər nazirləri şurasının 43-cü iclasında iştirak etmək məqsədilə Daşkənddə işgüzar səfərdə olan Azərbaycanın xarici işlər naziri Elmar Məmmədyarov özbək həmkarı Əbdüləziz Kamil ilə görüşüb.
XİN-in mətbuat xidmətindən APA-ya verilən məlumata görə, nazirlər iki ölkə arasındakı siyasi dialoq və hərtərəfli əməkdaşlığın inkişaf səviyyəsindən məmnunluq ifadə ediblər. E. Məmmədyarov tarixi İpək Yolunun bərpası və bu xüsusda Bakı-Tbilisi-Qars dəmir-yol layihəsi haqqında danışaraq Özbəkistanın da bu nəqliyyat dəhlizindən istifadə etməsi üçün əlverişli imkanların olduğunu bildirib.
Nazirlər nəqliyyat sahəsində əməkdaşlığın genişləndirilməsi və iqtisadi-ticarət əlaqələrinin artırılması üçün nümayəndə heyətləri səviyyəsində qarşılıqlı səfərlərinin təşkilinin vacibliyini vurğuladılar.
Görüşdə İƏT-in gündəliyi və qarşılıqlı maraq doğuran regional məsələlər ətrafında fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
