Azərbaycanın icmal büdcəsinin profisiti ötən il proqnozdan 5 dəfə artıq olub

Azərbaycanın icmal büdcəsinin profisiti ötən il proqnozdan 5 dəfə artıq olub
# 17 yanvar 2011 11:44 (UTC +04:00)
Bakı. Nicat Mustafayev – APA-Economics. Ötən il Azərbaycanın icmal büdcəsinin gəlirləri 19,3 mlrd. manat və ya 125,2% icra olunub ki, bu da 2009-cu ilə nisbətən 4,9 mlrd. manat və ya 33,7%, icmal büdcənin xərcləri 13,5 mlrd. manat və ya 94,7% icra olmaqla 2009-cu ilə nisbətən 1,3 mlrd. manat və 10,2% çox olub.

Maliyyə Nazirliyindən «APA-Economics»ə verilən məlumata görə, 2010-cu ilin icmal büdcəsi 1,2 mlrd. manat profisitlə proqnozlaşsa da, faktiki olaraq 5,8 mlrd. manat profisit olub.

Dövlət büdcəsinin mədaxili 11,4 mlrd. manat və ya 99,1%, 2009-cu illə müqayisədə isə 1,1 mlrd. manat və ya 10,4% çox icra edilib.

Hesabat ilində dövlət büdcəsinin xərcləri 11,8 mlrd. manat və ya 95,9%, 2009-cu illə müqayisədə isə 1,3 mlrd. manat və ya 12% çox olub.

Ötən il 2009-cu ilə nisbətən dövlət büdcəsindən elm, təhsil, səhiyyə, mədəniyyət, sosial müdafiə və sosial təminat, müdafiə, məhkəmə hakimiyyəti, hüquqi-mühafizə və prokurorluq orqanlarının saxlanılması, dövlət əsaslı vəsait qoyuluşu xərclərinə 11,6%-dək çox vəsait yönəldilib.

Hesabat dövründə dövlət büdcəsinin cari xərclərinin 3,7 mlrd. manatı və ya 31,5%-i sosialyönümlü xərclərin maliyyə təminatına sərf edilib ki, bu da 2009-cu illə müqayisədə 120 mln. manat və ya 3,3% çoxdur.

Ölkənin müdafiə potensialının gücləndirilməsi məqsədi ilə 2010-cu il dövlət büdcəsinin cari, əsaslı xərclərindən və ehtiyat fondlarından üst-üstə 2,2 mlrd. manat və ya 2009-cu illə müqayisədə 562 mln. manat və ya 35,5% çox vəsait yönəldilib.

Bunula yanaşı, 2010-cu il dövlət büdcəsinin dövlət əsaslı vəsait qoyuluşu xərcləri 4,1 mlrd. manat icra olunub ki, bu da 2009-cu illə müqayisədə 600 mln. manat və ya 16,3% çoxdur.

Bu mənbədən sosial təyinatlı layihələrə 508 mln. manat, infrastruktur təyinatlı layihələrə 1,9 mlrd. manat, müdafiə və digər təyinatlı layihələrə isə 1,7 mlrd. manat vəsait sərf edilib.

Hesabat dövründə Prezidentin Ehtiyat Fondundan məcburi köçkün ailələrin mənzil-məişət şəraitinin yaxşılaşdırılması məqsədilə yaşayış binalarının tikintisinə, Bakı şəhərində aparılan yenidənqurma və abadlıq işlərinin təmin edilməsinə, Ağcəbədi, Beyləqan, İmişli, Saatlı, Ağdaş rayonlarında və Şəki şəhərində yeni xəstəxanaların, Bakı Sağlamlıq Mərkəzinin tikintisinə, Ağcabədi, İmişli, Saatlı, Qusar, Sabirabad rayonlarında avtomobil yollarının yenidən qurulmasına, KİV-ə maliyyə yardımı və mətbuat işçilərinin mənzil-məişət şəraitinin yaxşılaşdırılması məqsədilə yaşayış evlərinin tikintisinə və yardıma və digər dövlət əhəmiyyətli tədbirlərə 159,5 mln. manat vəsait yönəldilib.

Bundan başqa, «2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı»nın icrasına 2010-cu il dövlət büdcəsindən 106 mln. manat vəsait yönəldilib, Dövlət Taxıl Fonduna tədarük edilməsi üçün idxal olunan taxıl və taxıl emalı məhsulları əlavə dəyər vergisindən azad edilib.

Hesabat dövründə sahibkarlara maliyyə dəstəyinin artırılması məqsədilə Sahibkarlığa Kömək Milli Fonduna dövlət büdcəsindən 44 mln. manat vəsait yönəldilib.

Ötən dövlət büdcəsindən «Aqrolizinq» SC-yə 40 mln. manat, o cümlədən Azərbaycan Respublikası Prezidentinin Ehtiyat Fondundan 5 mln. manat vəsait ayrılıb.

Büdcə və maliyyə sektorlarında şəffaflığın artırılması və səmərəliliyin daha da yüksəlməsi beynəlxalq maliyyə institutları və ekspertləri tərəfindən müsbət qiymətləndirilib.

Hesabat ilində «Standard & Poors» reytinq agentliyi Azərbaycanın reytinqini dəyişməyərək 2009-cu ilin səviyyəsində saxlayıb, «Fitch» agentliyi iqtisadi perspektivi «stabil» saxlayaraq, Azərbaycanın xarici və yerli valyutada uzunmüddətli kreditlər üçün reytinqini «BB+» səviyyəsindən ilk investisiya səviyyəsinə, yəni «BBB–» səviyyəsinə qaldırıb.

Dövlət büdcəsi prosesinin şəffaflığının səviyyəsi ilə bağlı 100-ə yaxın ölkədə sorğu aparan nüfuzlu Beynəlxalq Büdcə Əməkdaşlığı təşkilatının hesabatında isə Azərbaycanın büdcə sahəsində həyata keçirdiyi islahatlar və məqsədyönlü tədbirlər müsbət qiymətləndirilərək 100 ballıq şkala üzrə ölkəmizin göstəricisi 6 bal artırılaraq 43 bala çatdırılıb.
#
#

ƏMƏLİYYAT İCRA OLUNUR