Maliyyə

Ana səhifə

Maliyyə

Azərbaycanda əmanətlər üzrə real faiz dərəcəsi 2,6%-ə düşüb

05 may 2011 10:19 (UTC +04:00)

«APA-Economics»in rəsmi statistik göstəricilər əsasında apardığı hesablamalara görə, manat əmanətləri üzrə real orta faiz dərəcəsi illik 2,63%-ə bərabər olub. Qeyd edək ki, real faiz dərəcəsi inflyasiya göstəricisini də nəzərə alır. Azərbaycanda 2011-ci ilin I rübündə illik inflyasiya 9,1% təşkil edib.

Müqayisə üçün bildirək ki, ötən ilin yekunlarına görə, əmanətlər üzrə elan olunmuş faiz dərəcəsi 11,79% təşkil edib, 5,7%-lik illik inflyasiya nəzərə alınmaqla real faiz dərəcəsi isə 6,09%-ə bərabər olub. Eyni zamanda, 2009-cu ilin yekunlarına görə, əmanətlər üzrə orta faiz dərəcəsi 12,98%-ə bərabər olub və 2009-cu ildəki 1,5%-lik inflyasiya nəzərə alınmaqla real faiz dərəcələri 11,48% təşkil edib. Beləliklə, manat əmanətləri üzrə real orta faiz dərəcələrinin daim azalması müşahidə olunur. Həmçinin, martda bu göstərici 0,16 faiz bəndi azalıb.

Beləliklə, Azərbaycanın bank sistemində yaranmış vəziyyətə görə, əmanətçilər (orta hesabla) əmanətləri üzrə alınan gəlirlə yalnız istehlak qiymətlərinin artımını ödəyə və 2,6%-lik mənfəət əldə edə bilirlər. Yəni, Azərbaycan bankları əmanətlər üzrə faiz dərəcələrində inflyasiyanın səviyyəsini nəzərə almır. Bank mövqeyindən demək olar ki, onlar eyni zamanda kreditlər üzrə də faiz dərəcələrində inflyasiyaya uyğun artım etməyib. Belə ki, hazırda bankların faktiki orta kredit faiz dərəcəsi 16,41% olsa da, real faiz dərəcəsi (inflyasiya nəzərə alınmaqla) 7,31%-dir.

Aydındır ki, inflyasiyanın artması davam etdiyi halda, müəyyən vaxtdan sonra Azərbaycanda əmanətlər üzrə real faiz dərəcəsi «mənfi zonaya» keçə bilər.