Litva Seyminin sədri: “Azərbaycan və Litva arasında münasibətlər yeni mərhələyə qədəm qoyur”

Litva Seyminin sədri: “Azərbaycan və Litva arasında münasibətlər yeni mərhələyə qədəm qoyur”
# 10 fevral 2011 12:05 (UTC +04:00)
APA-nın məlumatına görə, bu fikirləri Azərbaycana səfərinin yekunlarına dair keçirdiyi mətbuat konfransında Litva Seyminin sədri İrena Dyaqutene bildirib.

Seym sədri Bakıya səfəri çərçivəsində Azərbaycanın hökumət strukturlarının rəhbərləri ilə bir sıra sahələrdə əməkdaşlıq məsələlərini müzakirə etdiklərini deyib: “Bunlardan birincisi iqtisadiyyat sahəsində əməkdaşlıqdır. Səfər çərçivəsində biznes-forum keçirildi və bu tədbir çərçivəsində 3 saziş imzalandı. Ümid edirik ki, bu forumun keçirilməsi Azərbaycanın Litva üçün mühüm biznes partnyora çevrilməsinə təkan verəcək və növbəti biznes-forum Litvada təşkil olunacaq”.

İ. Dyaqutyene həmçinin bildirib ki, Azərbaycan tərəfi ilə investisiyaların qoyuluşu, yeyinti və energetika sahəsində əməkdaşlıq da müzakirə olunub.

Litvanı enerji layihələrinin daha çox maraqlandırdığını deyən Seym sədri bildirib ki, hazırda ölkəsində sıxlaşdırılmış qaz terminalı yaradılır. Görüşdə Xəzərin neft ehtiyatlarının Ukrayna-Polşa üzərindən Litvaya nəqli, həmçinin ARDNŞ-in Litva nümayəndəliyinin açılması da müzakirə olunub.

“Bizi maraqlandıran məsələlərdən biri də nəqliyyat sahəsində əməkdaşlıqdır. “Vikinq” layihəsinin uzunluğunu artıraraq Azərbaycana qədər gətirməyi, “Vikinq” və TRACECA dəhlizini birləşdirməyi təklif edirik”, - deyə Seym sədri vurğulayıb.

Görüşlərdə turizmin inkişaf etdirilməsi üçün Bakı-Vilnüs-Bakı aviareyslərinin təşkili, Azərbaycan vətəndaşları üçün viza rejiminin sadələşdirilməsi, mədəniyyət sahəsində əlaqələrin genişləndirilməsi, tələbə mübadiləsi məsələlərinə də toxunulub. Azərbaycan tərəfi Litvada təhsil alan tələbələrin sayının artırılmasını müsbət qarşılayıb.
#
#

ƏMƏLİYYAT İCRA OLUNUR