Sietl şəhərində Azərbaycana həsr edilmiş akademik konfrans keçirilib

Sietl şəhərində Azərbaycana həsr edilmiş akademik konfrans keçirilib
# 10 may 2011 19:41 (UTC +04:00)
Bakı-APA. Vaşinqton ştatının Universitetində Azərbaycana həsr edilmiş akademik konfrans keçirilib.
APA-nın AzərTac agentliyinə istinadən verdiyi xəbərə görə, ölkəmizi öyrənən gənc tədqiqatçılar konfransda məruzələrlə çıxış ediblər. Universitetin aspirantı Con Kunts siyasi proseslər və azərbaycanlıların milli mənlik şüuru arasında qarşılıqlı əlaqə barədə öz fikirlərini söyləyib. Azərbaycanda “Sülh korpusu” proqramının iştirakçısı, ingilis dili müəlliməsi Melissa Lori isə Qax rayonu barədə təəssüratlarını bölüşüb. O, rayon gənclərinin öz təhsil səviyyələrini artırmaq istəklərini müsbət qiymətləndirib və “Sülh korpusu” proqramının iştirakçıları olan könüllülərin Azərbaycan-Amerika münasibətlərinin möhkəmlənməsinə verdiyi töhfəni qeyd edib. Doktorant Emil Əliyevin məruzəsi əsasən Azərbaycan iqtisadi modelinin öyrənilməsinə həsr edilmişdi.
Vaşinqton ştatı Universitetinin doktorantı Canin Mitçellin çıxışı xüsusi maraqla qarşılanıb. O, Avropa İttifaqının Xəzər regionuna münasibətdə enerji siyasətinin effektivliyi və regional inteqrasiyanın intensivləşməsində Azərbaycanın mühüm rolu məsələlərini şərh edib. Canin Mitçell 2010-cu ildə Azərbaycan prezidenti yanında Strateji Araşdırmalar Mərkəzində təcrübə keçib.
Seminar başa çatandan sonra Azərbaycanın Los-Ancelesdəki baş konsulu Elin Süleymanov Canin Mitçellə ümummilli lider Heydər Əliyev adına mükafatı təqdim edib. Baş konsulluq tərəfindən 2008-ci ildə təsis edilmiş bu mükafat Azərbaycanın və bütövlükdə Avrasiya regionunun öyrənilməsində fərqlənmiş amerikalı tələbələr üçün nəzərdə tutulur. Bu il həmin mükafata Montana ştatının Dövlət Universitetinin tələbələri layiq görülüblər.
Baş konsul Elin Süleymanov və vitse-konsul Ramil Qurbanov Sietl şəhərində Amerika Yəhudi Komitəsinin nümayəndələri ilə də seminar keçiriblər. Diplomatlar diskussiyanın gedişində tolerantlıq ideyalarını dəstəkləyən Azərbaycan rəhbərliyinin məqsədyönlü siyasəti, mədəniyyətlərarası dialoqun intensivləşməsinə Azərbaycanın töhfəsi barədə söhbət açmış, regionda vəziyyəti Vaşinqton ştatının yəhudi icmasının fəalları ilə müzakirə ediblər.
Xatırladaq ki, ABŞ-ın qərb ştatlarından olan Vaşinqton ştatı Azərbaycanın Los-Ancelesdəki baş konsulluğunun konsul dairəsinə daxildir.
#
#

ƏMƏLİYYAT İCRA OLUNUR