Xarici siyasət

Ana səhifə

Xarici siyasət

Səfir Aqşin Mehdiyev: “Ermənistan rəhbərliyi dərk etməlidir ki, demokratiya qılıncla inkişaf etdirilə bilməz və qanunsuz hərəkətlərlə qanuni hüquqlara nail olmaq olmaz”

04 noyabr 2011 11:32 (UTC +04:00)

Bu barədə APA-nın müxbirinə BMT Mətbuat Mərkəzindən məlumat veriblər.

Səfir son aylar Ermənistan Silahlı Qüvvələrinin Azərbaycanın mülki şəxslərinə və obyektlərinə qarşı hücumları intensivləşdirməsi ilə başlı narahatlığını bildirib. Sentyabr ayında ermənilər tərəfindən atəşkəsin pozulması nəticəsində Azərbaycan ordusunun üç əsgəri yaralanıb.

“Xüsusilə qeyd etmək lazımdır ki, bu dövrdə Ermənistan Silahlı Qüvvələri həm işğal etdikləri Azərbaycan ərazilərindən, həm də Ermənistan ərazisindən Azərbaycanın hərbi və mülki obyektlərini atəşə tutublar”.

Müraciətdə qeyd edilir ki, işğal edilmiş Azərbaycan ərazilərində hərbi xidmətdə olan ermənilər arasında döyüşdən kənar zorakılıq halları da müşahidə olunub.

“Kütləvi informasiya vasitələrinin Ermənistan Müdafiə Nazirliyi tərəfindən də təsdiq olunmuş məlumatlarına görə, Ermənistan ordusunun əsgəri Hovannes Vardanyan işğal olunmuş Azərbaycan ərazilərində 14 aylıq xidmətdən sonra ruhi xəstəxanaya aparılıb. Digər əsgər Hayk Mkrtçyan isə 2011-ci il sentyabrın 7-də öz əsgər yoldaşı tərəfindən öldürülüb. Bu faktlarla bağlı ciddi narahatlığını bildirən erməni hüquq müdafiə təşkilatları 1994-cü ildə elan edilmiş atəşkəs dövründə 1500 erməni əsgərinin döyüşdən kənar şəraitdə öldüyünü qeyd ediblər. Yuxarıda adları çəkilən əsgərlər hər ikisi Ermənistan vətəndaşlarıdır və onlar Ermənistanın Ararat və Eçmiədzin rayonlarının hərbi komissarlıqları tərəfindən orduya çağırılaraq Azərbaycanın işğal olunmuş bölgələrinə hərbi xidmətə göndəriliblər. Bundan əlavə hər iki insident Ermənistan Müdafiə Nazirliyinin istintaq şöbəsi tərəfindən bu ölkənin Cinayət Məcəlləsinə uyğun şəkildə araşdırılır”.

Səfir qeyd edib ki, əvvəlki insidentlərdə olduğu kimi, Ermənistan Müdafiə Nazirliyi yenə də Azərbaycanın işğal olunmuş ərazilərində öz ölkəsinin Cinayət Məcəlləsinə uyğun istintaq aparır.

Sonra səfir Mehdiyev BMT rəsmilərinin diqqətini Ermənistanın BMT-dəki daimi nümayəndəliyinin rəhbərinin son məktubuna yönəldib. Ermənistan təmsilçisi məktubunda 2011-ci il sentyabrın 18-də Azərbaycanın Dağlıq Qarabağ bölgəsində “yerli özünü idarəetmə orqanlarına” keçirilmiş qanunsuz “seçkiləri” erməni sakinlərin “fundamental hüquqlarından” istifadə etməsi kimi qələmə verib.

“O həmin regionun sayca xeyli çox olan, hüquq və azadlıqları qəsdən və kobud şəkildə pozulan azərbaycanlı əhalisinin taleyini qeyd etmir. Məlumdur ki, Ermənistan Azərbaycan torpaqlarını ələ keçirmək, orada etnik təmizləmə siyasəti həyata keçirmək və Azərbaycanın işğal olunmuş ərazilərində müstəqil olmayan etnik separatçı qurum yaratmaq üçün güc tətbiq edib. Bu bir faktdır ki, Azərbaycan əraziləri işğal altındadır və müvafiq beynəlxalq hüquq normaları baxımından Ermənistan işğalçı dövlətdir.

Beynəlxalq ictimaiyyət dəfələrlə separatçı qurumun qanunsuz olduğunu, onun təcavüz və irqi ayrı-seçkiliyin nəticəsindən başqa bir şey olmadığını qeyd edib və bəyan edib ki, Azərbaycanın işğal olunmuş ərazilərində keçirilən bütün “seçkilər” etibarsızdır.

Yaxşı olardı ki, Ermənistan daimi nümayəndəliyinin rəhbəri və ölkə rəhbərliyi BMT Təhlükəsizlik Şurası və Baş Assambleyanın müvafiq qətnamələrini, eləcə də digər beynəlxalq təşkilatların sənədlərini və üzv dövlətlərin çoxsaylı bəyanatlarını diqqətlə oxusunlar.

Ermənistan rəhbərliyi dərk etməlidir ki, demokratiya qılıncla inkişaf etdirilə bilməz və qanunsuz hərəkətlərlə qanuni hüquqlara nail olmaq olmaz. Heç kim başqalarının fundamental hüquq və azadlıqlarının pozulması hesabına özü üçün qanuni imtiyazlar tələb edə bilməz

Azərbaycan və beynəlxalq ictimaiyyət hesab edir ki, Ermənistanın Azərbaycanın işğal olunmuş ərazilərində yaradılmış müstəqil olmayan etnik separatçı quruma legitimlik, müstəqillik və demokratiya görüntüsü vermək cəhdləri başlanğıcdan uğursuzluğa məhkumdur”.