Xarici siyasət

Ana səhifə

Xarici siyasət

Heydər Əliyev Fondu Pakistana “Suzuki” markalı təcili tibbi yardım avtomobili və 2000 ədəd qan köçürmə paketi hədiyyə edib - FOTO

Heydər Əliyev Fondu Pakistana “Suzuki” markalı təcili tibbi yardım avtomobili və 2000 ədəd qan köçürmə paketi hədiyyə edib - <font color=red>FOTO</font>

18 iyun 2012 13:40 (UTC +04:00)

Bakı – APA. Heydər Əliyev Fondunun prezidenti, UNESCO və İSESCO-nun xoşməramlı səfiri, millət vəkili, Azərbaycanın birinci xanımı Mehriban Əliyevanın təşəbbüsü və dəstəyi ilə Pakistanın müxtəlif əyalətlərində və şəhərlərində həyata keçirilən silsilə humanitar tədbirlərin davamı olaraq səfir Daşqın Şikarov Heybər Paxtunxva əyalətinə səfər edib. Xarici İşlər Nazirliyinin mətbuat xidmətindən APA-ya verilən məlumata görə, səfər çərçivəsində M. Əliyevanın təşəbbüsü və dəstəyi ilə talassemiya, hemofiliya və qan xərçəngindən əziyyət çəkən xəstələrin müalicəsi ilə məşğul olan bir neçə xəstəxananı özündə birləşdirən Həmzə Xeyriyyə Fonduna xüsusi qanköçürmə və kiçik laboratoriya ilə təchiz olunmuş 1 ədəd “Suzuki” markalı təcili tibbi yardım avtomobili və 2000 ədəd qan köçürmə paketi təqdim edilib.

Heydər Əliyev Fondunun adından hədiyyə olunan təcilli tibbi yardım avtomobili vasitəsilə əyalətin müxtəlif şəhərlərində, xüsusilə, Pakistanın Əfqanıstanla sərhəddə yerləşən ucqar məntəqələrində qan xəstəliklərindən əziyyət çəkən xəstələrə təhlükəsiz qan köçürülmə xidmətləri göstəriləcək, həmçinin, Hepatit C, Hepatit B, HİV/AİDS virusunun müəyyənləşdirilməsi üçün yerli əhali arasında pulsuz testlər təşkil olunacaq.

Təqdimetmə mərasimində çıxış edən Pakistan Senatının komitə sədri, senator Hacı Qulam Heydər Əliyev Fondu adından hədiyyə olunan təcili tibbi yardım avtomobilinin və 2000 ədəd qanköçürmə paketinin on minlərlə insanın müalicəsinə töhfə verəcəyini və bu hadisənin məhz 14 iyun - Beynəlxalq Donorlar gününə təsadüf etməsini, həmçinin bu münasibətlə Azərbaycan səfirinin şəxsən qan verməsini yüksək qiymətləndirərək, M. Əliyevaya, Azərbaycan xalqına və dövlətinə təşəkkürünü bildirib. O, ölkələr arasındakı qardaşlıq münasibətlərinin yüksək səviyyədə inkişaf etdiyini, Azərbaycan torpaqlarının Ermənistan tərəfindən işğal edilməsi ilə heç zaman barışmayacaqlarını, müharibə başlayacağı təqdirdə özü başda olmaqla, bütün pakistanlıların azərbaycanlı qardaşları ilə bərabər çiyin-çiyinə vuruşmağa hazır olduqlarını bildirib.

Daha sonra səfir Paxtunxva Göz xəstəxanasını ziyarət edib, xəstəxananın yeni korpusunun tikilməsi və göz xəstəliklərindən əziyyət çəkən imkansız xəstələrin əməliyyat olunması üçün Heydər Əliyev Fondunun adından xəstəxanaya maliyyə yardımı göstərib. Xəstəxananın baş həkimi Xalid Sultan Xavca xəstəxananın yeni korpusunun tikintisinə və yüzlərlə imkansız xəstələrin pulsuz əməliyyat olunması üçün göstərdiyi maliyyə yardımına görə M. Əliyevaya, Azərbaycan xalqına və dövlətinə təşəkkürünü bildirib.