Xarici siyasət

Ana səhifə

Xarici siyasət

Azərbaycanda Rusiyanın Şimali Qafqaz dairəsinin vahid nümayəndəliyinin yaradılması planlaşdırılır

28 iyun 2012 09:01 (UTC +04:00)

APA-nın xəbərinə görə, bunu Bakıda keçirilən “Rusiya-Azərbaycan dialoqu-2012” adlı III Rusiya-Azərbaycan regionlararası forumunda çıxışında Rusiya prezidentinin Şimali Qafqaz federal dairəsi üzrə səlahiyyətli nümayəndəsinin müavini Sergey Subbotin deyib. O bildirib ki, ötən il Azərbaycanla Rusiya arasında ticarət dövriyyəsinin rekord səviyyəsi qeydə alınıb.

S. Subbotin Rusiyanın Azərbaycan biznesinin Şimal Qafqazda turizmin inkişafına cəlb olunmasında maraqlı olduğunu söyləyib. O qeyd edib ki, birgə iqtisadi layihələrin reallaşdırılması Cənubi Qafqazdan Rusiya və Avropaya koridorun yaranmasına imkan verəcək: “Əməkdaşlığın fəallaşdırılması üçün Şimali Qafqaz dairəsinin Azərbaycanda vahid nümayəndəliyinin yaradılması planlaşdırılır. Hazırda hüquqi məsələlər həll olunur”.

Rusiya Federasiyasının Azərbaycandakı səfiri Vladimir Doroxin də regional əlaqələrin inkişafının önəmini qeyd edib: “Son illər Rusiya ilə Azərbaycan regionları arasında əlaqələr kəskin şəkildə güclənir”. Səfir bu müddət ərzində Rusiyanın 7 federasiya subyektinin nümayəndə heyətlərinin Azərbaycana səfər etdiyini və 6 regionla Azərbaycan arasında əməkdaşlıq sazişləri imzalandığını söyləyib: “Ölkələr arasında əməkdaşlığın regional komponenti getdikcə artır”.

Azərbaycan_Rusiya