Xarici siyasət

Ana səhifə

Xarici siyasət

Latviyanın sabiq prezidenti: Ukraynaya yardım gecikdirilsə, bu, çox baha başa gələcək - MÜSAHİBƏ

15 mart 2024 11:51 (UTC +04:00)

XI Bakı Qlobal Forumunda iştirak edən Latviyanın sabiq prezidenti Eqils Levitsin APA-ya müsahibəsi

- Rusiya Ukraynada müharibəyə başlayanda Qərb ölkələri - demokratik güclər Ukraynanın yardımına yetişdilər. Ancaq son zamanlar biz müəyyən fikirlərin səsləndiyi görürük, artıq Qərb ölkələri “Ukrayna yorğunluğunu” yaşayırlar. Bu fikirlər nə dərəcədə həqiqəti əks etdirir?

- Müəyyən bir "yorğunluq" var, bunu inkar edə bilmərəm. Amma Qərb cəmiyyəti, dövlətlərin əksəriyyəti başa düşür ki, indi Ukraynaya kömək etmək daha yaxşıdır və mən deyərdim ki, bu yardım gecikdirilsə, bu, çox baha başa gələcək, çünki sonradan Rusiya NATO ərazisini təhdid edəcək. Ona görə də indi Ukraynaya ancaq real siyasət kömək edə bilər. Bilirsiniz ki, silah-sursat tədarükü məsələsində müəyyən çatışmazlıqlar var. Lakin Aİ və NATO ölkələri Ukraynaya silah-sursatın daha tez çatdırılması barədə qərarlar qəbul ediblər. Problem onda idi ki, NATO əvvəllər hərbi potensialına kifayət qədər sərmayə qoymurdu və indi bu hərbi potensialın Ukraynaya göndərilməsinə ehtiyac var. Təbii ki, hazırkı potensial imkanlar kifayət deyil. Beləliklə, biz hərbi istehsala sərmayə qoyuruq və güman edirəm ki, yaxın gələcəkdə tədarüklər xeyli sürətlənəcək.

- Qərbdə fikirlər səslənir ki, əgər Rusiya Ukraynada dayandırılmasA, növbəti hədəf Qərb olacaq. Hətta dəqiq desək Baltikyanı ölkələrin adı da çəkilir, Estoniyanın Baş naziri xanım Kallas bu barədə tez-tez danışır... Rusiyanın Baltikyanı ölkələr üçün təhdidi nə dərəcədə realdır, bu barədə nə düşünürsünüz?

- Bütün Avropa üçün təhlükə var, çünki Rusiya bütün Avropaya hökmranlıq etmək istəyir və bilirsiniz ki, Rusiyanın əvvəlki prezidenti (Medvedev-red.) London, Paris və s. barədə danışır. Deməli, bu, Moskvanın əsl məqsədidir. Ancaq təbii ki, biz öz müttəfiqlərimizlə müdafiəmizdə, xarici siyasətimizdə bir yerdəyik. Bir ölkəyə hücum etmək eyni anda bütün NATO ölkələrinə hücum etmək deməkdir. Bu, bizim gücümüzün əsasıdır, ona görə də Rusiyanın konkret bir ölkəni seçəcəyini düşünmürəm, çünki Moskva bilir ki, bu baş verərsə, NATO-nun kollektiv cavabı ilə üzləşəcək.