Hadisə

Ana səhifə

Hadisə

Azərbaycanın Baş Prokurorluğu korrupsiya faktı ilə bağlı yeni məlumat yayıb

25 iyun 2012 11:15 (UTC +04:00)

Bakı. Hafiz Heydərov-APA. Bakıda Mənzil-Kommunal İstismar Sahəsinin əməkdaşı rüşvət alarkən cinayət başında tutulub. APA-nın Baş Prokurorluğun saytına istinadən verdiyi məlumata görə, Bakı şəhər sakininin Bakı şəhəri Mənzil-Kommunal Təsərrüfatı Departamentinin 18 saylı Mənzil-Kommunal İstismar Sahəsinin mühəndisi Quliyev Səməd Dadaş oğlunun ondan yaşadığı evin özəlləşdirilməsi üçün tələb olunan sənədlərin verilməsinə görə rüşvət tələb etməsi barədə Baş prokuror yanında Korrupsiyaya qarşı mübarizə idarəsinə daxil olmuş müraciəti araşdırılıb.

Müəyyən edilib ki, S. Quliyev ona müraciət edən Bakı şəhər sakinindən yaşadığı evin özəlləşdirilməsi məqsədi ilə Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinə təqdim edilməsi üçün tələb olunan yaşayış evinin plan ölçüsü və 2 saylı formanın verilməsindən ötrü 1000 manat pul tələb edib. Həyata keçirilmiş əməliyyat tədbirləri nəticəsində S. Quliyev iyunun 21-də xidməti otağında 500 manat pulu vətəndaşdan rüşvət kimi alarkən cinayət başında yaxalanıb. Həmin pullar hal şahidlərinin iştirakı ilə götürülərək rəsmiləşdirilib.

Fakta görə S. Quliyev barəsində Cinayət Məcəlləsinin 311.1-ci (rüşvət alma) maddəsi ilə cinayət işi başlanıb. S. Quliyev təqsirləndirilən şəxs qismində cəlb edilərək ona həmin maddə ilə ittiham elan olunmaqla barəsində məhkəmənin qərarı ilə həbs qətimkan tədbiri seçilib.

Hazırda iş üzrə istintaq davam etdirilir.