Məhkəmə radikal dini qruplaşma üzvünün işgəncəyə məruz qalması ilə bağlı baş prokurora və MTN rəhbərliyinə məlumat göndərilməsi barədə qərar verib

Məhkəmə radikal dini qruplaşma üzvünün işgəncəyə məruz qalması ilə bağlı baş prokurora və MTN rəhbərliyinə məlumat göndərilməsi barədə qərar verib
# 15 aprel 2009 10:01 (UTC +04:00)
APA-nın məlumatına görə, hakim İslam Neymanov bildirib ki, təqsirləndirilən İlkin İsmayılovun anası Arzu İsmayılovanın adından məhkəməyə müraciət daxil olub. O, işə ədalətli baxılmasını xahiş edilib. Müdafiə tərəfi adından çıxış edən vəkil Yavər Hüseyn bildirib ki, dünən təqsirləndirilən İlkin İsmayılova qarşı işgəncəyə yol verilib, o, Milli Təhlükəsizlik Nazirliyinin təcridxanasında nəzarətçilər tərəfindən döyülüb, məcburi şəkildə üzü qırxılıb, bədəninin müxtəlif hisslərinə xəsarətlər yetirilib. Daha sonra İ. İsmayılov özü vəsatətlə çıxış edib. Təqsirləndirilən deyib ki, MTN təcridxanasında nəzarətçilər tərəfindən qanunsuz olaraq ondan saqqalını qırxmaq tələb olunub. Bu tələbi yerinə yetirmədiyinə görə, əlləri məcburi şəkildə qandallanıb, qaşları, saqqalı qırxılıb: “Sonra məni lüt soyundurub, indi istifadə olunmayan soyuq karsa saldılar. Tələb etdim ki, məni burdan çıxarın. Karsda bir düymə tapıb, qollarımı doğradım. Öləcəm, ancaq ədaləti deyəcəm. Onlar dedilər ki, bizə rəis tapşırıq verib. Həyatım təhlükə qarşındadır. Məhkəmədən xahiş edirəm ki, Ombudsman Elmira Süleymanova, İşgəncələrə Qarşı Azərbaycan Komitəsinin sədri Elçin Behbudov yanıma gəlsinlər. Bununla bağlı konkret tədbir görüb bizi Bayıldakı İstintaq Təcridxanasına köçürsünlər. Əks halda ilkin olaraq aclıq edəcəyəm. Əlimdən hər hansı bir cinayət çıxa bilər”.
Prosesdə digər təqsirləndirilənlər Kamran Əsədov, Samir Mehrəliyev və başqaları İlkin İsmayılov dediklərinin həqiqət olduğunu, bu halın onların da başına gəldiyini deyiblər.
Vəkillər çıxış edərək məhkəmədən bu gün bununla bağlı konkret tədbir görülməsini, işgəncə törədənlərin cəzalandırılmasını istəyiblər.
Təqsirləndirilən Vüqar Əliyev isə baş verənlərə etiraz əlaməti olaraq dünəndən aclığa başladığını deyib.
Dövlət ittihamçısı Oruc Cəlilov da məsələ ilə bağlı araşdırma aparılmasını lazım olduğunu deyib.
Məhkəmə yerində müşavirə keçirərək qərara alıb ki, hadisə ilə bağlı təcili olaraq respublikasının baş prokuroruna, MTN rəhbərliyinə məlumatlar göndərilsin, təqsirləndirilənlərin saxlanmasında təhlükəsizlik təmin edilsin.
Daha sonra prosesdə cinayət işi ilə bağlı sənədlər elan olunub.

Qeyd edək ki, təqsirləndirilən şəxslər - Kamran Əsədov, Bəxtiyar Orucov, Fərid Cabbarov, Elşən Məmmədov, Kamran Babayev, Samir Mehrəliyev, Tərlan Kərimov, Edqar Əliyev, Ramil Kərimov, Şirvani Babayev, Samir Əliyev, Yaşar Məhərrəmov, Orxan Əlizadə, Hacıbala Hüseynov, Azər İbadov, Şəhriyar Məhərrəmov, Ramin Cəlilov, Rövşən Əbdüləliyev, İlkin İsmayılov və Vüqar Əliyev dini radikal qrupda birləşərək, hərbi mübarizəyə başlamağa cəhd etməkdə, Bakıdakı “LUKoyl” yanacaqdoldurma məntəqəsinə silahlı basqın etməkdə, ABŞ və Böyük Britaniyanın Azərbaycandakı səfirliklərinə qarşı terror aktı hazırlamaqda ittiham olunurlar.
#
#

ƏMƏLİYYAT İCRA OLUNUR