Hadisə

Ana səhifə

Hadisə

Beynəlxalq terrorçu şəbəkə ilə əlaqədə ittiham olunan 31 nəfər Azərbaycan vətəndaşından ibarət mütəşəkkil dəstə üzvlərinin məhkəmə istintaqı yekunlaşıb

08 iyun 2010 11:48 (UTC +04:00)

APA-nın xəbərinə görə, prosesə sədrlik edən hakim Azər Orucov məhkəmədə çıxışların tam yekunlaşdığını bildirib. Bundan sonra məhkəmə hökmü elan etmək üçün müşavirəyə yollanıb.

Hökm iyunun 16-da elan ediləcək.

Qeyd edək ki, dövlət ittihamçısı təqsirləndirilənlər Asif Əmikişili, Rəşid Mustafayev, Emil Şıxəliyevin 15 il , Mahir Allahverdiyev, Firdovsi Quliyevin 14 il, Vasif Ömərov, Elməddin Fərəcov, Faiq Cəfərovun 13 il, İbadət Alazovun 12 il, Kamran İlyasov, Teymur Axundov, Amil Xəlilov, Elnur Qazıyev, Elşən Druskarın 11 il, Mehdi Kərimov, Mahir Abdullayev, Tural Həsənov, Ceyhun Əliyev, Zeynal Əkbərovun 10 il, Alkərəm Məmmədov, Rəşad Nəbiyev, Vüsal İsayevin 8 il, Vüqar Abduıllayev, Namiq Məmmədov, Ramil Fərzəliyevin 7 il, Arif İbrahimov, Elçin Canağayev, Rəşad Mahmudov, Fuad Mövsümov, Emin Caminin 6 il, Bəxtiyar Mustafayevin isə 4 il müddətinə azadlıqdan məhrum edilməsini istəyib.

İttihama görə, beynəlxalq terrorçu şəbəkə ilə əlaqəli olan qrup qanuna zidd silahlı birləşmə yaradaraq dövlət əleyhinə hərəkətlər etməyi planlaşdırıb. Qrupun rəhbəri “Abdulla” ləqəbli Azər Misirxanov vaxtilə müxtəlif münaqişə zonalarında qanunsuz silahlı birləşmələrin tərkibində xüsusi təlimlərdə və döyüş əməliyyatlarında iştirak edib. O, 2001-ci ildə Azərbaycan dövlət sərhədini qeyri-qanuni keçərkən saxlanılıb, sərhədi qanunsuz keçməyə və qanunvericiliklə nəzərdə tutulmayan silahlı birləşmənin tərkibində iştirak etməyə görə məhkum olunub. Cəza müddəti bitdikdən sonra antiterror koalisiyası qüvvələrinə qarşı terrorçuluq əməllərində iştirak etmək məqsədilə Azər Misirxanov xarici ölkə ərazisinə keçib. Bu silahlı birləşmənin üzvləri Bakı şəhərində yerləşən “Əbu Bəkr” məscidində 2008-ci il avqustun 17-də terror törədilməsində təqsirləndirilən şəxs qismində cəlb olunaraq barəsində axtarış elan edilmiş “Meşə qardaşları” adlı silahlı birləşmənin rəhbərlərindən biri “Süleyman” ləqəbli Samir Mehdiyevin Azərbaycanda istintaqdan yayınaraq digər dövlətin ərazisində gizlənməsini təşkil ediblər. Qrup Bakı-Novorossiysk”neft boru kəmərini partlatmağı da planlaşdırıb. Saxlanılan zaman onların üzərindən külli miqdarda silah-sursat aşkarlanaraq, götürülüb.

Qeyd edək ki, təqsirləndirilənlər Azərbaycan Cinayət Məcəlləsinin 279.1-ci (qanunvericiliklə nəzərdə tutulmayan silahlı birləşmələri və ya qrupları yaratma), 29,214.2.1-ci (qabaqcadan əlbir olan bir qrup şəxs tərəfindən terrorçuluğa cəhd), 29, 214.2.3-cü (qabaqcadan əlbir olan bir qrup şəxs tərəfindən odlu silahdan və silah qismində istifadə olunan predmetlərdən istifadə etməklə terrorçuluğa cəhd), 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, döyüş sursatı və partlayıcı maddələr və qurğular əldə etmə, başqasına vermə, saxlama, daşıma və ya gəzdirmə) və s. maddələri üzrə ittiham olunurlar.

Bir müddət əvvəl “Abdulla” ləqəbli Azərbaycan vətəndaşı Azər Misirxanov Əfqanıstanda ABŞ hərbi birləşmələrinin keçirdikləri əməliyyat tədbirləri zamanı öldürülüb.

Samir Mehdiyev isə Pakistanda saxlanılaraq Azərbaycana gətirilib.