İntihar etmiş polkovnik İlqar Əliyev ibtidai istintaqda Eldar Mahmudovun əleyhinə ifadə verib

İntihar etmiş polkovnik İlqar Əliyev ibtidai istintaqda Eldar Mahmudovun əleyhinə ifadə verib
# 03 may 2017 15:41 (UTC +04:00)

Ləğv olunmuş Milli Təhlükəsizlik Nazirliyinin (MTN) Antiterror Mərkəzinin rəis müavini, həbsdə intihar etmiş polkovnik İlqar Əliyevin istintaq zamanı verdiyi ifadə məlum olub.

APA-nın məlumatına görə, İ. Əliyev 2015-ci il dekabrın 15-də ifadə verib. Bundan beş gün sonra intihar edib.

İ. Əliyev ifadəsində Maqsud Mahmudovun haqlı olduğunu deyib. Bildirib ki, Eldar Mahmudov Tərlan adlı şəxs barəsində təqsirləndirici material toplamaqları barədə idarə rəisi Elçin Quliyevə şifahi göstəriş verib. Elçin Quliyev də bu məsələ ilə məşğul olmağı ona tapşırıb: “Mən də Tərlanın istifadəsində olan telefon danışıqlarına dair məlumatları əldə edərkən, onun Mark Şamilov adlı şəxslə konfliktinin olduğunu müəyyən etdim. Bundan sonra Markı nazirliyə dəvət etdik və Tərlanın qanunsuz əməlləri barədə məlumat aldıq. Bu barədə nazirə məruzə edildi. Daha sonra Tərlan Bakı şəhər Prokurorluğunda aparılan cinayət işi üzrə həbs olundu. Mark Şamilov isə Maqsud Mahmudov adlı şəxsin onun torpaq sahəsini zəbt etdiyini bildirərək köməklik etməsini xahiş etdi. Bununla bağlı Mark ərizə yazdı. Daha sonra Elçin Quliyevə məruzə edərək razılığını aldıqdan sonra Maqsud Mahmudovu MTN-ə dəvət etməsini Antiterror Mərkəzinin əməkdaşı Azər Mehdiyevə tapşırdım”.

İlqar Əliyev ifadəsində bildirib ki, Azər Mehdiyev Maqsudu dəvət etdikdən sonra xidməti otağında ona hədə-qorxu gəlib: “Buna görə də Maqsud otaqda qusmuşdu. İşçilərdən kimsə bu barədə mənə məlumat verdi. Mən də Azərin otağına gedərək Maqsudu orada gördüm. Bir qədər sonra Azər yanıma gələrək Maqsudun 50 min ABŞ dolları məbləğində pul vermək istədiyini bildirdi. Mən də bu barədə Elçin Quliyevə məruzə etdim. Elçin Quliyev isə 50 min dolların az olduğunu dedi, Maqsudun 200 min ABŞ dolları verməsini tələb etdi. Bu barədə Azərə dedim və daha sonra Azər getdi”.

İlqar Əliyevin ifadəsinə görə, bir qədər sonra Azər yenidən gələrək Maqsudun 150 min ABŞ dollarından artıq pul verə bilməyəcəyini deyib: “Mən də Elçin Quliyevin yanına gedərək bu barədə məruzə etdim. Elçin Quliyev də mənim yanımda sabiq nazirə məruzə edərək çağırdıqları Maqsud adlı şəxsin 150 min ABŞ dolları verə biləcəyini bildirdi. Eldar Mahmudov da razılıq verərək, Maqsudun MTN-dən çıxmasına icazə verdi. Maqsud ödəməli olduğu pulları bir neçə dəfəyə gətirərək Azərə verdi. Azər də öz növbəsində mənə verdi. Hətta bəzi vaxtlarda Maqsud pulları vaxtında verə bilməyəndə pulun əvəzinə qızıl-zinət əşyaları göndərdi. Lakin həmin əşyaları geri qaytarıb, pul gətirməsini istədik”.

İki ay müddətində Maqsudun hissə-hissə 120 min ABŞ dolları pulu Azərə verdiyini deyən İ. Əliyevin sözlərinə görə, bu haqda Eldar Mahmudova məruzə edilib. E. Mahmudov isə həmin puldan 70 min ABŞ dollarının köməkçisi Vüqar Mahmudova verməsini, qalan 50 min dolları isə baş idarə daxilində bölməsini istəyib: “Elçin Quliyev də 70 min ABŞ dollarını Vüqar Mahmudova göndərdi, 20 min ABŞ dollarını özü götürdü, 10 min ABŞ dollarını mənə verdi, 10 min ABŞ dollarını bölmələri üçün Azər Mehdiyev və Ramil Hümbətova verdi, 10 min ABŞ dollarını isə ərizəçi Mark Şamilova verdilər”.

Qeyd edək ki, İlqar Əliyevin intihar etməsi ilə bağlı onun barəsində olan cinayət təqibinə xitam verilib.

Xatırladaq ki, biznesmen Maqsud Mahmudov bildirib ki, MTN-də ondan külli miqdarda pul tələb edilib. MTN-dən bildiriblər ki, həmin pulu verməsə, İŞİD-ın üzvü və ya narkobaron kimi həbs ediləcək. Onun sözlərinə görə, iş adamını telefonla təmas qurduğu xanımla da şantaj ediblər.

M. Mahmudov bildirib ki, həmin hadisədən sonra avtomobil və digər əmlaklarını sataraq pulu MTN əməkdaşlarına verib.

MTN-in Antiterror Mərkəzinin rəisi olmuş Elçin Quliyevə Cinayət Məcəlləsinin 145.3-cü (qanunsuz azadlıqdan məhrum etməklə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olma), 181.3.1-ci (mütəşəkkil dəstə tərəfindən quldurluq törətmək), 181.3.2-ci (külli miqdarda əmlak əldə etmək məqsədi ilə quldurluq törətmək), 182.3.1-ci (mütəşəkkil dəstə tərəfindən hədə-qorxu yolu ilə tələb etmə), 182.3.2-ci (külli miqdarda əmlak əldə etmək məqsədi ilə hədə-qorxu yolu ilə tələb etmə), 302.2-ci (əməliyyat-axtarış fəaliyyəti haqqında qanunvericiliyi pozma, eyni əməllər informasiyanın gizli yolla götürülməsi üçün nəzərdə tutulan xüsusi texniki vasitələrdən istifadə edilməklə törədildikdə), 308.2-ci (vəzifə səlahiyyətlərindən sui-istifadə etmək), 309.2-ci (vəzifə səlahiyyətlərini aşmaqla, zor tətbiq etməklə və ya zor tətbiq etmə hədəsi ilə törədildikdə, yaxud silah və digər xüsusi vasitələrdən istifadə etməklə törədildikdə və ya ağır nəticələrə səbəb olma), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 311.3.2-ci (təkrar rüşvət alma), 311.3.3-cü (külli miqdarda rüşvət alma) maddələri ilə ittiham elan olunub.

Digər təqsirləndirilən şəxslər də eyni maddələrlə ittiham edilirlər.

#
#

ƏMƏLİYYAT İCRA OLUNUR