Rüşvətxorluqda təqsirləndirilən sabiq bağça direktorunun məhkəməsi başlayıb

Rüşvətxorluqda təqsirləndirilən sabiq bağça direktorunun məhkəməsi başlayıb
# 10 iyun 2013 10:36 (UTC +04:00)

Bakı. Şəhriyar Əlizadə - APA. Bakı Ağı Cinayətlər Məhkəməsində rüşvətxorluqda təqsirləndirilən Xırdalan şəhər 17 saylı uşaq bağçasının sabiq direktoru Lalə Əmirovanın cinayət işi üzrə məhkəmənin hazırlıq iclası keçirilib.

APA-nın məlumatına görə, prosesdə təqsirləndirilən şəxsin anket məlumatları dəqiqləşdirilib. Prosesin baxış iclası isə iyunun 18-nə təyin edilib.

Baş Prokurorluğun yaydığı məlumata görə, Xırdalan şəhər 17 saylı uşaq bağçasının direktorunun qanunsuz hərəkətləri barədə şəhər sakininin Baş prokuror yanında Korrupsiyaya qarşı mübarizə idarəsinin “161-Qaynar xətt” əlaqə mərkəzinə daxil olmuş müraciəti araşdırılıb. Müəyyən edilib ki, bağçanın direktoru Lalə Əmirova xidməti səlahiyyətlərinin icrası ilə əlaqədar Xırdalan şəhər sakininin azyaşlı qızının bağçaya qəbul olunmasına görə 200 manat məbləğində pul tələb edib, həmin məbləğin 100 manatını 2012-ci ilin dekabr ayında azyaşlının bağçaya qəbul edilməsi üçün zəruri olan sənədlərlə birlikdə rüşvət kimi alıb. L.Əmirova cinayətkar əməllərini davam etdirərək 4 mart 2013-cü il tarixdə xidməti otağında 60 manat məbləğində pulu rüşvət kimi alarkən Baş prokuror yanında Korrupsiyaya qarşı mübarizə idarəsinin əməkdaşları tərəfindən cinayət başında yaxalanıb.

Baxış zamanı L.Əmirovanın üzərindən rüşvət kimi aldığı 60 manat, şəxsi pul kisəsindən 1.494 manat və 40 avro, xidməti otağından digər sənədlər aşkar edilərək maddi sübut kimi götürülüb. L.Əmirova Cinayət Məcəlləsinin 311.1-ci (rüşvət alma) maddəsi ilə təqsirləndirilən şəxs qismində cəlb edilərək ona həmin maddə ilə ittiham elan olunub və barəsində məhkəmənin qərarı ilə vəzifədən kənarlaşdırılmaqla polisin nəzarəti altına vermə qətimkan tədbirləri seçilib.

#
#

ƏMƏLİYYAT İCRA OLUNUR