Vəkil 3,4 milyon dolları dələduzluq yolu ilə ələ keçirməkdə təqsirləndirilən şəxsə bəraət istəyib

Vəkil 3,4 milyon dolları dələduzluq yolu ilə ələ keçirməkdə təqsirləndirilən şəxsə bəraət istəyib
# 16 fevral 2018 12:35 (UTC +04:00)

Bakı Ağır Cinayətlər Məhkəməsində 3,4 milyon ABŞ dolları məbləğində vəsaiti dələduzluq yolu ilə ələ keçirməkdə təqsirləndirilən Loğman Abdullayevin atası Çingiz Abdullayevin məhkəməsi davam etdirilib.

APA-nın məlumatına görə, hakim Tamilla Nəsrullayevanın sədrliyi ilə keçirilən prosesdə Ç. Abdullayevin vəkili müdafiə nitqi ilə çıxış edib. O, deyib ki, hüquqlarını müdafiə etdiyi şəxs hadisə vaxtı Qazaxıstanda olduğu üçün kimdənsə pul tələb edə bilməzdi: "Buna görə də, hüquqlarını müdafiə etdiyim şəxs barəsində bəraət hökmünün çıxarılmasını məhkəmədən xahiş edirəm”.

Məhkəmə Ç. Abdullayeva son söz üçün vaxt verib.

Proses fevralın 21-də davam etdiriləcək.

Qeyd edək ki, Ç. Abdullayev Qazaxıstanda saxlanılıb. 2015-ci ildə Bakı şəhər sakini Tofiq Nadir oğlu Zülfüqarov Daxili İşlər Nazirliyinə (DİN) müraciət edərək bir qrup şəxsin ona məxsus 3 milyon 400 min ABŞ dolları məbləğində vəsaiti dələduzluq yolu ilə ələ keçirdiklərini bildirib. Baş İdarənin əməkdaşları tərəfindən həyata keçirilən tədbirləri nəticəsində Loğman Abdullayev, Nurlan Bayramov, Emin Qasımov, Ruslan Hacıyev, Pərviz Rzayev, Fərhad Tağıyev, Gəray Abdullayev, Tural Babazadə və Tural Qasımov saxlanılıb. Həmin şəxslər Cinayət Məcəlləsinin (CM) 145.2.4-cü (qanunsuz azadlıqdan məhrumetmə, bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə), 170.3.1-ci (yetkinlik yaşına çatmayanı cinayətkar fəaliyyətə cəlb etmə), 178.3.1-ci (dələduzluq, mütəşəkkil dəstə tərəfindən törədildikdə), 178.3.2-ci (dələduzluq, külli miqdarda ziyan vurmaqla törədildikdə) və 310-cu (vəzifəli şəxsin səlahiyyətlərini mənimsəmə) maddələri ilə ittiham olunublar. Bakı Ağır Cinayətlər Məhkəməsinin hökmü ilə L. Abdullayev və N. Bayramovun hər biri 18 il, P. Rzayev və E. Qasımovun hər biri isə 16 il müddətinə azadlıqdan məhrum ediliblər. Ev dustaqlığında olan təqsirləndirilən R. Hacıyevə 5 il sınaq müddəti təyin olunmaqla şərti cəza verilib. F. Tağıyevə isə 3 min manat cərimə təyin edilib və barəsində başqa yerə getməmək haqqında iltizam tədbiri seçilib. Digər təqsirləndirilən G. Abdulov 2 min manat cərimə olunub, T. Babazadə barəsində isə 3 il sınaq müddəti təyin edilməklə şərti cəza verilib.

Daha sonra L. Abdullayevin atası Ç. Abdullayev barəsində cinayət işi başlanıb, ona 5 maddə üzrə ittiham irəli sürülüb. Ç. Abdullayev barəsində həbs qətimkan tədbiri seçilib. O, CM 145.2.4-cü (qanunsuz azadlıqdan məhrum etmə, bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə), 170. 3-cü (yetkinlik yaşına çatmayanı cinayətkar fəaliyyətə cəlb etmə), 178.3.1-ci (dələduzluq, mütəşəkkil dəstə tərəfindən törədildikdə), 178.3.2-ci (dələduzluq, külli miqdarda ziyan vurmaqla törədildikdə) və 310-cu (vəzifəli şəxsin səlahiyyətlərini mənimsəmə) maddələri ilə təqsirli bilinir. Ç. Abdullayev Azərbaycanda olmadığı üçün onun barəsində axtarış elan olunub.

#
#

ƏMƏLİYYAT İCRA OLUNUR