İnfrastruktur

Ana səhifə

İnfrastruktur

Ötən il Əmlak Məsələləri Dövlət Komitəsinin 4 işçisi yol verdiyi nöqsanlara görə işdən azad edilib

29 yanvar 2011 08:21 (UTC +04:00)

Bakı. Elnur Hüseynquluyev - APA-Economics. Azərbaycanın Əmlak Məsələləri Dövlət Komitəsi 2010-cu il ərzində görülmüş işlərlə bağlı geniş hesabatını açıqlayıb.

Komitədən «APA-Economics»ə verilən məlumata görə, hesabat ilində «Şəffaflığın artırılması və korrupsiyaya qarşı mübarizə üzrə Milli Strategiyanın təsdiq edilməsi barədə» prezident sərəncamının icrasını təmin etmək məqsədilə Komitə üzrə 2010-cu il üçün Tədbirlər Planı təsdiq edilib.

Milli Strategiyanın icrası ilə bağlı komitə tərəfindən dövlət əmlakının idarə edilməsi və özəlləşdirilməsi, daşınmaz əmlak üzərində hüquqların dövlət qeydiyyatı və şəffaflığın daha da artırılması sahəsində 2010-cu ildə müvafiq tədbirlər görülüb. Belə ki, komitədə vətəndaş müraciətlərinə baxılmasının sürətləndirilməsi, operativ sənəd mübadiləsinin təşkili, sənədlərlə işin keyfiyyətinin, sürətinin və icra fəaliyyətinin səmərəliliyinin artırılması məqsədilə müasir informasiya-kommunikasiya texnologiyaları tətbiq olunmaqla Avtomatlaşdırılmış Sənəd Dövriyyəsi İnformasiya Sistemi (ASDİS) qurulub. Bu sistem artıq 2011-ci ilin yanvar ayının ilk günlərindən istifadəyə verilib. Eyni zamanda komitənin və qurumların rəsmi internet səhifələri vasitəsilə birbaşa müraciətlərin və elektron ərizələrin qəbul edilməsi imkanları da yaradılıb.

Komitədə dövlət qulluğuna qəbul və vakant vəzifələrin tutulması üçün 2010-cu ildə Prezident yanında Dövlət Qulluğu Məsələləri üzrə Komissiya ilə birlikdə 1 müsabiqə və 1 müsahibə təşkil edilib. Nəticələrə əsasən müvafiq vəzifələrə işçilər qəbul edilib. Daha 1 müsahibə elan edilib, nəticəsi isə hələlik açıqlanmayıb.

Bundan başqa, fəaliyyət proseslərində yol verdikləri nöqsanlara görə 2010-cu il ərzində 40-a yaxın komitə əməkdaşına müxtəlif intizam tənbeh tədbirləri görülmüş, 4 nəfər işdən azad edilib.

2010-cu ildə keçirilmiş ixtisaslaşdırılmış çek hərraclarında vətəndaşların tam bərabərhüquqlu iştirakı, hərraclarda şəffaflığın daha da artırılması istiqamətində zəruri tədbirlər görülür. Belə ki, özəlləşdirmədə maarifləndirmə tədbirlərini nəzərdə tutan, hüquq və vəzifələrin izah olunması, dövlət əmlakının satışı üzrə keçirilən hərraclarda şəffaflığın təmin olunması məqsədilə komitənin internet saytında hərraclara dair operativ şəkildə məlumat əldə edilməsinə şərait yaradılıb.

Şəffaflığın və səmərəliliyin təmin edilməsi məqsədilə dövlət əmlakının özəlləşdirilməsi prosesinə cəlb edilmiş «Ernst & Young», «Finre Consulting», «REC-İnvest», «Metrika», «ASPİ» və «BLCC» beynəlxalq məsləhətçi şirkətlərlə aparılan işlər ötən il də davam etdirilib.