Sahil Babayev Türkiyənin Azərbaycandakı səfiri ilə görüşüb

Sahil Babayev Türkiyənin Azərbaycandakı səfiri ilə görüşüb
# 02 iyul 2018 10:36 (UTC +04:00)

Əmək və əhalinin sosial müdafiəsi naziri Sahil Babayevlə Türkiyə Respublikasının ölkəmizdəki fövqəladə və səlahiyyətli səfiri Erkan Özoral arasında görüş olub.

Nazirliyin ictimaiyyətlə əlaqələr şöbəsindən “APA-Economics”ə verilən xəbərə görə, görüşdə səfirliyin əmək və sosial müdafiə üzrə müşaviri Ahmet Açıkgöz də iştirak edib.

S.Babayev Azərbaycan Prezidenti İlham Əliyevin tapşırıqlarına uyğun olaraq hazırda Əmək və Əhalinin Sosial Müdafiəsi Nazirliyinin fəaliyyət istiqamətlərində həyata keçirilən islahatlar barədə səfiri məlumatlandırıb. Azərbaycan və Türkiyə arasında əmək, sosial müdafiə və məşğulluq sahələri üzrə mövcud olan əməkdaşlıq əlaqələrindən bəhs edən nazir bu əməkdaşlığın daha da inkişaf etdirilməsi üçün geniş potensialın mövcud olduğunu diqqətə çatdırıb. S.Babayev bir sıra vacib sahələrlə yanaşı, əmək bazarının tənzimlənməsi, qeyri-rəsmi məşğulluğun qarşısının alınması, əlilliyin qiymətləndirilməsi sisteminin təkmilləşdirilməsi, bu sahədə meyarların qabaqcıl beynəlxalq praktikaya uyğunlaşdırılması, əlilliyi olanların reabilitasiyası və cəmiyyətə inteqrasiyası kimi aktual iş sahələrində qardaş ölkənin təcrübəsinin öyrənilməsinin xüsusi önəmini qeyd edib.

Nazir Əmək Münasibətlərinin Tənzimlənməsi və Koordinasiyası Komissiyasına üzv qurumların nümayəndələrinin Türkiyənin Azərbaycandakı səfirliyinin dəstəyi ilə ötən il Türkiyəyə səfərinin əhəmiyyətini qeyd edib. O, İslam Əməkdaşlıq Təşkilatının Bakıda yaradılacaq Əmək Mərkəzinin 10 ölkə tərəfindən imzalanması nəzərdə tutulan Nizamnaməsinin artıq Türkiyə və Azərbaycan tərəfindən imzalandığını bildirib.

Türkiyə ilə Azərbaycan arasında ikitərəfli dostluq və qardaşlıq münasibətlərinin ildən-ilə inkişaf etdiyini vurğulayan E.Özoral əmək və sosial müdafiə sahəsində də uğurlu əməkdaşlıq təcrübəsinin formalaşdığını, qarşıdakı dövrdə əlaqələrin genişləndirilməsi üçün səfirlik tərəfindən səylərin göstəriləcəyini vurğulayıb.

Görüşdə iki ölkə arasında əmək və əhalinin sosial müdafiə sahəsində gələcək əməkdaşlığa dair fikir mübadiləsi aparılıb.

#
#

ƏMƏLİYYAT İCRA OLUNUR