Maliyyə

Ana səhifə

Maliyyə

Avropa Yenidənqurma və İnkişaf Bankı Azərbaycan bank sisteminin kreditləşməsini davam etdirir

25 iyun 2009 11:21 (UTC +04:00)

Bakı. Nicat Mustafayev – APA-Economics. Avropa Yenidənqurma və İnkişaf Bankının (AYİB) Direktorlar Şurası Azərbaycanın «UniBank» Səhmdar Kommersiya Bankına 37 mln. ABŞ dolları məbləğində kreditin ayrılmasını təsdiqləyib. «APA-Economics»in məlumatına görə, bunu AYİB-in Azərbaycan nümayəndəliyinin başçısı Frensis Deley bildirib.

Onun sözlərinə görə, tərəflər arasında kredit üzrə imzalanma prosesinin cari ilin iyul ayında keçiriləcəyi gözlənilir: «Biz Azərbaycanda bank sektoruna dəstəyi davam etdiririk və «UniBank»a 37 mln. dollar məbləğində yeni maliyyə vəsaiti ayıracağıq. Kredit üzrə imzalanma yəqin ki, iyulda keçiriləcək».

Qeyd edək ki, ümumiyyətlə AYİB-in dəstəyi ilə «Unibank» 83 mln. dollar kredit cəlb edəcək. Vəsait kapitala investisiya, konvertasiya oluna bilən istiqraz və ilkin tələbli borc formasında təqdim oluna bilər. Bundan başqa, paketin Almaniyanın DEG Şirkəti, Niderlandın İnkişaf Maliyyə Şirkəti (FMO) və Avstriya İnkişaf Bankı (OeEB) tərəfindən maliyyələşdirilməsi nəzərədə tutulur. Maliyyələşmə «UniBank»ın dəstəklənməsinə, kapital bazasının gücləndirilməsinə və real iqtisadiyyata kreditlərin verilməsinə xidmət edəcək.

AYİB 37 mln. dollarlıq yeni maliyyələşdirməni 15,8 mln. dollar ilkin tələbli borc (qalan 32,5 mln. dollarını DEG, FMO və OeEB tərəfindən maliyyələşdiriləcək), 17,5 mln. dollar konvertasia olunan istiqraz (qalan 7,5 mln. dollarını DEG tərəfindən maliyyələşdiriləcək) və 1,1 mln. dollar kapitala investisiyanın yatırılması şəklində təqdim edəcək.

Xatırladaq ki, təsisçisi AYİB (15,15%), DEG (8,33%), hüquqi (0,9%) və fiziki şəxslər (75,62%) olan «UniBank» 1992-ci ildən fəaliyyət göstərir. Hazırda bankın respublika üzrə 24 filialı fəaliyyət göstərir. Cari ilin aprelin 1-nə bankın aktivlərinin həcmi 374,181 mln. manat, depozit portfeli 89,353 mln. manat, kredit portfeli 286,677 mln. manat, məcmu kapitalı 68,900 mln. manat, o cümlədən nizamnamə kapitalı 15 mln. manat təşkil edib.