Maliyyə

Ana səhifə

Maliyyə

«Azərbaycan Sənaye Bankı» və «Azercell» birgə kredit kampaniyasına başlayıb

01 iyul 2009 11:24 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Bankı» ASC «BlackBerry Enterprise Server Krediti» adlı yeni kredit kampaniyasına başlayıb.

Bankın baş ofisindən «APA-Economics»ə verilən məlumat görə, bu yaxınlarda «Azercell» mobil rabitə operatoru tərəfindən Azərbaycan bazarına təqdim olunan «BlackBerry solution» məhsulu elektron poçt, telefon, təqvim, veb, multimedia və digər biznes və adi proqramlara asan şəkildə simsiz çıxışın təmin edilməsinə imkan verən smartfon, kompüter proqramları və xidmətlərini bir araya gətirən vasitədir.

ASB-nin yeni kredit məhsulundan istifadə edəcək korporativ müştərilər sərfəli şərtlərlə «BlackBerry Enterprise Server» sayəsində daha sürətli və səmərəli xəbərləşmə imkanına sahib olacaq və iş planında əhəmiyyətli irəliləyişə nail olacaqlar. Kredit kampaniyası çərçivəsində ASB illik 20%-lə server xərclərini 100% kreditləşdirmək imkanını yaratmaqla 2,7 min manatdan 50 min manatadək kredit təqdim edir.

«BlackBerry solution» daxilində «Azercell» korporativ müştərilər üçün «BlackBerry Enterprise Server» məhsulunu təklif edir. «BlackBerry Enterprise Server»in proqramı IBM, «Lotus», «Domino», «Microsoft Exchange» və «Novell GroupWise» kompüter proqramları ilə sıx şəkildə uzlaşır və elektron poçt ilə digər korporativ məlumatlara təhlükəsiz və «push» əsasında simsiz çıxışı təmin etmək məqsədilə şifrələnmə və İT siyasətinə nəzarət mexanizmlərindən istifadə edir.

Xatırladaq ki, «Azərbaycan Sənaye Bankı» 1996-cı ildə «CI Bank» ASC kimi fəaliyyətə başlayıb və 2006-cı ilin sonunda brendini dəyişib. Cari ilin aprel ayının 1-nə bankın aktivlərinin həcmi 61,373 mln. manat, depozit portfeli 22,272 mln. manat, kredit portfeli 35,134 mln. manat, məcmu kapitalı 17,082 mln. manat, o cümlədən nizamnamə kapitalı 12,8 mln. manat təşkil edib. Hazırda bankın respublika üzrə 8 filialı, 22 bankomatı və 251 POS-terminalı fəaliyyət göstərir.