Maliyyə

Ana səhifə

Maliyyə

Azərbaycan bank sistemində cari mənfəət artır

01 iyul 2009 13:26 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının 2009-cu ilin yanvar-may ayları ərzində əldə etdiyi vergi ödənilənədək mənfəətin həcmi 139,45 mln. manat təşkil edib. Azərbaycan Mərkəzi Bankından «APA-Economics»ə verilən məlumata görə, ötən ilin müvafiq dövrü ilə müqayisədə bu göstərici 14,61 mln. manat və ya 11,7% artıb.

Cari ilin ilk beş ayı ərzində yaranmış mənfəətin 55,31 mln. manatı yanvar, 24,7 mln. manatı fevral, 870 min manatı mart, 34,47 mln. manatı aprel, 24,1 mln. manatı isə may ayının payına düşür.

Yanvar-may aylarının nəticələrinə görə, aktivlər üzrə xüsusi ehtiyatlara ayırmalar (42,27 mln. manat) nəzərə alınmaqla, bankların cəmi mənfəətinin həcmi 181,72 mln. manata bərabər olub. Bu da ötən ilin analoji 5 aylıq göstəricisi ilə müqayisədə 44,81 mln. manat və ya 19,8% azdır. Beləliklə, son bir ildə aktivlər üzrə xüsusi ehtiyatlara ayırmalar 59,42 mln. manat və ya 2,4 dəfə azalıb.

Yanvar-may ayları ərzində bankların faiz gəlirləri 430,65 mln. manat, faiz xərcləri 188,40 mln. manat təşkil edib, nəticədə xalis faiz mənfəəti 242,25 mln. manat olub. Bundan əlavə, bankların qeyri-faiz gəliri 103,30 mln. manat, qeyri-faiz xərcləri isə 163,64 mln. manat təşkil edib ki, bunun nəticəsində 60,34 mln. manat məbləğində xalis qeyri-faiz zərəri yaranıb.

Beləliklə, bankların qeyri-faiz əməliyyatları üzrə mənfəət deyil, zərər əldə etməsi tendensiyası davam etməkdədir ki, bunun da nəticəsində bank fəaliyyətinin yekun maliyyə nəticələrinə ziyan dəyir. Göründüyü kimi, faiz əməliyyatları üzrə bankların gəlirləri xərcləri təxminən 2,3 dəfə üstələyir, lakin qeyri-faiz əməliyyatları üzrə bankların zərərlə işləməsi həmin üstünlüyün böyük hissəsini heçə endirir.