Maliyyə

Ana səhifə

Maliyyə

«Azərqarant» sığorta şirkəti son bir ildə ödənişləri 40% azaldıb

14 iyul 2009 08:16 (UTC +04:00)

Bakı. Elnur Hüseynquluyev – APA-Economics. Azərbaycanın «Azərqarant» sığorta şirkətinin 2009-cu ilin yanvar-iyun aylarında topladığı sığorta haqlarının həcmi 323,438 min manat təşkil edib ki, bu da ötən ilin müvafiq dövrü ilə müqayisədə 37% azdır.

Şirkətin İdarə Heyətinin sədr müavini Şükür Hüseynovun «APA-Economics»ə verdiyi məlumata görə, hesabat dövründə şirkətin sığorta riskləri üzrə ödənişləri 39,9% azalaraq 66,490 min manata çatıb.

Ş.Hüseynovun sözlərinə görə, sığorta daxilolmalarının strukturunda ən çox vəsait «Əmlakın yanğından və digər risklərdən sığortası» (112,043 min manat), «Fərdi qəza və xəstəlik sığortası» (57,068 min manat), «Avtonəqliyyat vasitələrinin sığortası» (25,082 min manat) növləri üzrə toplanılıb. Bu sığorta növlərinin məcmu daxilolmalarda xüsusi çəkisi müvafiq olaraq 34,6%, 17,6% və 7,75% təşkil edib.

Ödənişlərə gəldikdə isə, ən çox vəsait «Avtomobillərin sığortası» (38,700 min manat), «Avtonəqliyyat vasitəsi sahiblərinin mülki məsuliyyətinin icbari sığortası» (21,121 min manat) və «Əmlakın yanğından və digər risklərdən sığorta» (3,985 min manat) növləri üzrə ödənilib. Qeyd edək ki, bu sığorta növlərinin məcmu ödənişlərdə payı müvafiq olaraq 58,2%, 31,8 % və 6% təşkil edib.

Xatırladaq ki, bu ilin birinci yarısında şirkətin qeyri-həyat sığortası növləri üzrə daxilolmaları 201,342 min manat, bu növ üzrə ödənişləri isə 45,369 min manat olub.

Qeyd edək ki, təsisçisi bir fiziki şəxs olan «Azərqarant» sığorta şirkəti 1993-cü ildən fəaliyyət göstərir. Cari ilin iyul ayının 1-nə şirkətin nizamnamə kapitalı 1 mln. manat təşkil edib. Hazırda şirkət 22 könüllü və 4 icbari sığorta növü üzrə xidmət göstərir.