Maliyyə

Ana səhifə

Maliyyə

MBASK sığorta şirkətinin sığorta daxilolmalarının həcmi 3,724 mln. manata çatıb

21 iyul 2009 08:41 (UTC +04:00)

Bakı. Elnur Hüseynquluyev – APA-Economics. Azərbaycanın MBASK sığorta şirkətinin 2009-cu ilin yanvar-iyun aylarında topladığı sığorta haqlarının həcmi 3,724 mln. manata çatıb.

Şirkətin baş ofisindən «APA-Economics»ə verilən məlumata görə, bu müddət ərzində məcmu sığorta daxilolmalarının 40%-ni (1,499 mln. manat) «Avtomobil sığortası», 22%-ni (181,714 min manat) «Bədbəxt hadisələrin sığortası» növü və 10%-ni (371,887 min manat) isə «Əmlakın sığortası» növləri təşkil edib.

Qeyd edək ki, şirkətin bu ilin ilk altı ayında verdiyi sığorta ödənişlərinin həcmi rekord həddə çatıb. Belə ki, sığorta riskləri üzrə şirkətin həyata keçirdiyi sığorta ödənişlərinin həcmi ötən ilin analoji dövrün göstəricisi ilə müqayisədə 39% artaraq 3,504 mln. manat təşkil edib. Bu prosesi şirkətin yüksək ödəniş qabiliyyətinin və maliyyə sabitliyinin göstəricisi hesab etmək olar.

Ənənəvi olaraq ödənişlərin əksəriyyəti «Avtomobil sığortası» müqavilələri üzrə yerinə yetirilib. Belə ki, bu növ üzrə sığorta ödənişlərinin həcmi 1,894 mln. manat, «Bədbəxt hadisələrin sığortası» üzrə 727,433 min manat, «Tibbi sığorta» üzrə 466,720 min manat, «Yanğından sığorta» 163,554 min manat, «nəqliyyatın hava növlərinin sığortası» növü üzrə isə 66,152 min manat olub.

Müqavilələr üzrə ödənişlərin alınmasının orta müddəti sığorta hadisəsi üzrə ərizənin verildiyi andan sonra, iki həftə təşkil edib. İtkilərin məbləği az olduqda, bu müddət bir neçə günə qədər azalıb.

Qeyd edək ki, bu ilin birinci yarısında MBASK sığorta şirkətinin məhsul xətti yeni sığorta məhsulları ilə genişləndirilib. Bu istiqamətdə iş «Sərfəli Sığorta» kampaniyası çərçivəsində başlanılıb. Şirkət bazar üçün uyğunlaşdırılmış, əhalinin orta gəlirli geniş təbəqələri üçün əlverişli olan və əmlakın, avtomobilin, üçüncü şəxslər qarşısında cavabdehliyin sığorta olunmasına imkan verən sığorta məhsullarını, habelə məqbul olan qiymətə opsiyaların seçim əsasında sayı üzrə turist səyahətlərini fəal surətdə tətbiq edir.

Xatırladaq ki, MBASK sığorta şirkəti 1992-ci ildən fəaliyyət göstərir. Şirkətin təsisçiləri sırasına Avropa Yenidənqurma və İnkişaf Bankı (30%) və fiziki şəxslər daxildir. Cari ilin yanvar ayının 1-nə şirkətin nizamnamə kapitalı 2 mln. manat təşkil edib. Hazırda şirkət 29 sığorta növü üzrə xidmət göstərir.