Maliyyə

Ana səhifə

Maliyyə

“Muğan Bank” depozit bazası son bir ildə 52% genişlənib

24 iyul 2009 08:38 (UTC +04:00)

Bakı. Elnur Hüseynquluyev - APA-Economics. Azərbaycanın «Muğanbank» Səhmdar Kommersiya Bankının (SKB) aktivlərinin həcmi cari ilin iyul ayının 1-nə 116,379 mln. manat təşkil edib ki, bu da ötən ilin iyul ayının 1-nə olan göstərici ilə müqayisədə 15,5% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 52% genişlənərək 48,962 mln. manat, kredit portfeli 6,2% artaraq 69,707 mln. manat, o cümlədən istehlak kreditlərinin həcmi 14,6% artaraq 16,444 mln. manat olub. Həmçinin bankın məcmu kapitalı 42,5% artaraq 21,201 mln. manat, o cümlədən nizamnamə kapitalı 63,6% artaraq 18 mln. manata çatıb.

Qeyd edək ki, son bir ildə bankın gəlirləri 1% artaraq 6,807 mln. manat, xərcləri isə 20% artaraq 6,791 mln. manat olub. Nəticədə bank cari ilin birinci yarısında 16 min manat mənfəət əldə edib.

Bundan başqa, bu dövr ərzində bank tərəfindən əlavə 5 filial açılıb, 5 bankomat və 12 POS-terminal quraşdırıb. Cari ilin iyul ayının 1-nə bankın işçilərinin sayı 389 nəfərə çatıb ki, bu da son bir illə müqayisədə 39,4 % çoxdur.

Xatırladaq ki, «Muğan Bank» SKB 1992-ci ildən fəaliyyət göstərir. Bankın hazırda 26 filialı, 29 bankomatı və 63 POS-terminalı mövcuddur.