Maliyyə

Ana səhifə

Maliyyə

«Xalq Bank» müştəriləri üçün «SMS-məlumatlandırma» xidmətini tətbiq edib

25 iyul 2009 08:33 (UTC +04:00)

Bakı. Elnur Hüseynquluyev – APA-Economics. Azərbaycanın «Xalq Bank» Səhmdar Kommersiya Bankı (SKB) müştəriləri üçün «SMS-məlumatlandırma» xidmətini tətbiq edib.

Bankın baş ofisindən «APA-Economics»ə verilən məlumata görə, artıq bankın müştərilərinin öz kart hesablarına mobil telefon vasitəsilə nəzarət etmək imkanı var. Bankın müştəriləri öz kartları vasitəsilə aparılan hər əməliyyat barədə 24 saat ərzində məlumat alacaqlar.

Qeyd edək ki, «SMS məlumatlandırma» xidməti yalnız «Azercell Telekom» BM-in abonentləri (post-paid – abunə və pre-paid – Sim-Sim, Açıq Xətt, GəncSim və s.) olan «Xalq Bank»ın plastik kart sahiblərini əhatə edir. «SMS məlumatlandırma» xidmətinə yalnız həmin müştəriyə məxsus olan kartlar qoşula bilər.

Xidmətə qoşulmaq üçün bankın baş ofisinə və ya hər hansı filialına yaxınlaşıb sadəcə ərizəni doldurmaq lazımdır. Xatırladaq ki, «Xalq Bank»ın «Master Card» və «Visa» kartları pulsuz və illik xidmət haqqı olmadan müştərilərə verilir.

Təsisçisi bir neçə hüquqi şəxs olan «Xalq Bank» SKB 2004-cü ildən fəaliyyət göstərir. Cari ilin aprel ayının 1-nə bankın aktivlərinin həcmi 386,153 mln. manat, depozit portfeli 209,476 mln. manat, kredit portfeli 341,894 mln. manat, bankın məcmu kapitalı 62,311 mln. manat, o cümlədən nizamnamə kapitalı 53,550 mln. manat təşkil edib.

Hazırda bankın respublika üzrə 9 filialı fəaliyyət göstərir.