Maliyyə

Ana səhifə

Maliyyə

Cari ilin I yarısında Azərbaycanın uzaq xarici ölkələri ilə ticarət dövriyyəsində müsbət, MDB ölkələri ilə ticarət dövriyyəsində isə mənfi saldo yaranıb

27 iyul 2009 08:37 (UTC +04:00)

Bakı. Rəşad Süleymanov – APA-Economics. Cari ilin yanvar-iyun aylarında Azərbaycanın uzaq xarici ölkələri ilə ticarətində 3 207 150,2 min ABŞ dolları müsbət saldo, MDB ölkələri ilə ticarət dövriyyəsində isə 114 431,1 min dollar mənfi saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.

Hesabat dövründə Azərbaycandan uzaq xarici ölkələrə 5 097 853,2 min dollar, MDB ölkələrinə isə 713 748,2 min dollar dəyərində əmtəə ixrac olunub, xarici ölkələrdən Azərbaycana 1 890 703 min dollar, MDB ölkələrindən isə 828 179,3 min dollar dəyərində əmtəə idxal olunub.

Azərbaycandan hesabat dövründə uzaq xarici ölkələrə və MDB-yə əsasən mineral yanacaq, neft və neft məhsulları, bitumlu materiallar, polimer materialları, heyvan və bitki mənşəli yağlar, tərəvəz ixrac olunub. bu ölkələrdən isə daha çox avadanlıqlar, mexaniki qurğular, elektrik maşınları, quru nəqliyyatı vasitələri, dənli bitkilər idxal edilib.

Qeyd edək ki, cari ilin yanvar-iyun aylarında Azərbaycanın 122 ölkə ilə apardığı ticarət əməliyyatlarının həcmi 8 530 483,6 min dollar təşkil edib. Bunun 5 811 601,4 min dolları ixrac, 2 718 882,3 min dolları isə idxal əməliyyatlarının payına düşüb.