Maliyyə

Ana səhifə

Maliyyə

Azərbaycanda bankların mənfəəti artıb

29 iyul 2009 12:28 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının 2009-cu ilin yanvar-iyun ayları ərzində əldə etdiyi vergi ödənilənədək mənfəətin həcmi 156,68 mln. manat təşkil edib. Azərbaycan Mərkəzi Bankından «APA-Economics»ə verilən məlumatına görə, ötən ilin müvafiq dövrü ilə müqayisədə bu göstərici 31,84 mln. manat və ya 25,5% artıb.
Cari ilin ilk 6 ayı ərzində yaranmış mənfəətin 55,31 mln. manatı yanvar ayına, 24,7 mln. manatı fevral ayına, 870 min manatı mart ayına, 34,47 mln. manatı aprel ayına, 24,1 mln. manatı may ayına, 17,23 mln. manatı isə iyun ayına düşür.
İlk yarımilliyin yekunlarına görə, 46,16 mln. manat təşkil edən aktivlər üzrə xüsusi ehtiyatlara ayırmalar nəzərə alınmaqla, bankların cəmi mənfəətinin həcmi 202,84 mln. manata bərabər olub ki, bu da ötən ilin yanvar-iyun göstəricisi ilə müqayisədə 23,69 mln. manat və ya 10,5% azdır. Beləliklə, son bir ildə aktivlər üzrə xüsusi ehtiyatlara ayırmalar 55,53 mln. manat və ya 2,2 dəfə azalıb.
Yanvar-iyun ayları ərzində bankların faiz gəlirləri 512,91 mln. manat, faiz xərcləri 225,71 mln. manat təşkil edib, nəticədə xalis faiz mənfəəti 287,2 mln. manat olub. Bundan əlavə, bankların qeyri-faiz gəliri 127,89 mln. manat, qeyri-faiz xərcləri isə 211,97 mln. manat təşkil edib ki, bunun nəticəsində 84,08 mln. manata bərabər olan xalis qeyri-faiz zərər yaranıb.
Bankların maliyyə nəticələrinin təhlili iki əsas tendensiyanı aşkara çıxarır. Birincisi, böhran şəraitinə və bundan irəli gələrək kredit bazarında fəallığın kəskin aşağı düşməsinə baxmayaraq, Azərbaycanın kommersiya bankları öz mənfəətlərini artırır. İkinci əsas məqam bankların qeyri-faiz əməliyyatları üzrə hələ də zərərlə işləməsindən ibarətdir. Əgər birinci amil birmənalı olaraq müsbət qiymətləndirilməlidirsə, bankların qeyri-faiz xərclərinin qeyri-faiz gəlirlərini təxminən 1,7 dəfə üstələnməsi kredit və investisiyalarla birbaşa bağlı olmayan bank xidmətlərinin hələ də istənilən səviyyədən aşağı olduğunu, bankların bu sahədəki böyük potensialdan faydalanmadığını göstərir.