Maliyyə

Ana səhifə

Maliyyə

Azərbaycanda qısamüddətli kreditlərin payı artır

30 iyul 2009 07:43 (UTC +04:00)

Bakı. Vahab Rzayev – APA-Economics. Azərbaycanda 2009-cu ilin iyun ayının sonuna ötən ilin müvafiq dövrü ilə müqayisədə qısamüddətli kredit qoyuluşları 14%, uzunmüddətli kredit qoyuluşları isə 0,4% artıb. Azərbaycan Mərkəzi Bankından “APA-Economics”ə verilən məlumata görə, nəticədə dövr ərzində kredit qoyuluşlarının strukturunda qısamüddətli kreditlərin xüsusi çəkisi 2,8% bənd artıb və iyulun 1-nə 32,8%-ə bərabər olub:

(mln. man.)

	01.07.09	01.07.08
Kredit qoyuluşları	6 463,8	6 185,1
Qısamüddətli kreditlər	2 119,4	1 859,7
Xüsusi çəkisi (%)	32,8	30
Uzunmüddətli kreditlər	4 344,4	4 325,4
Xüsusi çəkisi (%)	67,2	70

Mərkəzi Bankın hesablamalarına görə, təhlil olunan dövrdə qısamüddətli kredit qoyuluşunun 94,7%-ni banklar tərəfindən verilən kreditlər, 5,3%-ni isə qeyri-bank kredit təşkilatlarının kreditləri təşkil edib. O cümlədən bank sisteminin qısamüddətli kredit qoyuluşunda Azərbaycan Beynəlxalq Bankının payı 32,5%, digər bankların payı isə 67,5% təşkil edir.
Uzunmüddətli kredit qoyuluşunun 98,5%-i banklar tərəfindən verilən kreditlər, 1,5%-i isə qeyri-bank kredit təşkilatlarının kreditləridir. Bank sisteminin uzunmüddətli kredit qoyuluşunda Beynəlxalq Bankın kreditlərinin payı 44,7%, digər bankların payı isə 55,3% təşkil edir.