Maliyyə

Ana səhifə

Maliyyə

Azərbaycanda milli valyuta ilə kreditlər üzrə orta faiz dərəcələri 17,12%-ə enib

31 iyul 2009 07:36 (UTC +04:00)

Bakı. Vahab Rzayev – APA-Economics. Azərbaycanda 2009-cu ilin iyun ayında milli valyuta ilə kreditlər üzrə orta faiz dərəcələri ötən ilin müvafiq dövrü ilə müqayisədə 0,65 faiz bəndi azalaraq iyulun 1-nə 17,12% təşkil edib. Azərbaycan Mərkəzi Bankından “APA-Economics”ə verilən məlumata görə, manatla hüquqi şəxslər üzrə orta faiz dərəcələri 0,75 faiz bəndi azalaraq 14,80%, fiziki şəxslər üzrə isə 0,25 faiz bəndi artaraq 21,19% təşkil edib:

	Kreditlərə görə orta		Hüquqi şəxslər üzrə		Fiziki şəxslər üzrə
	Manatla	Xarici valyuta	Manatla	Xarici valyuta	Manatla	Xarici valyuta
01.07.08	17.76	14.11	15.55	11.52	20.94	21.05
01.01.09	17.45	14.52	14.87	12.37	21.53	21.52
01.07.09	17.12	17.59	14.80	15.01	21.19	22.67

Göründüyü kimi, il ərzində kreditlər üzrə faiz dərəcələrdə nəzərə çarpan səviyyədə dəyişmə baş verməyib. Lakin maraqlı məqam odur ki, ötən ilin oktyabrından başlayaraq Mərkəzi Bank tərəfindən uçot dərəcəsi 15%-dən hazırkı 2%-dək endirilib, lakin bu, kommersiya banklarının kreditləri üzrə faiz dərəcələrində öz əksini tapmayıb. Əksinə, xarici valyutada olan kreditlər üzrə faiz dərəcələri il ərzində müəyyən qədər artıb. Bankların faiz dərəcələrinin uçot dərəcəsindən asılı olmaması bankların öz kredit fəaliyyətlərini əsasən cəlb edilən depozitlər hesabına həyata keçirməsindən irəli gəlir. Mərkəzi Bankın hesablamalarında görə, manatla kreditlərlə depozitlər arasındakı fərq ötən ilin müvafiq dövründə 5,68%-dən 5,67%-ə düşüb, xarici valyutada kreditlərlə depozitlər arasındakı fərq isə 4,48%-dən 6,82%-ə yüksəlib.